គួរឱ្យសរសើរ ព្រីកា ណាស់ មានឈ្មោះជាអតីតក្មេងរើសសំរាមរស់នៅក្រោមដំបូលអង្គការCCF ច្រើនឆ្នាំ បានសម្រេចយកថវិការពីការលក់សំបុត្ររឿង « រង់ចាំ » ជួយដល់កុមារកំព្រាកំពុងខ្វះខាត ទុកជាការសងគុណ ។
ព្រីកា គឺជាអតីតក្មេងរើសសំរាមនៅស្ទឹងមានជ័យដែលមានប្រវត្តិតស៊ូយ៉ាងជូរចត់ក្នុងជីវិតកាលពីនៅវ័យកុមារ ត្រូវបានអង្គការ CCF រើសយកមកចិញ្ចឹមនិងអប់រំផ្តល់ចំណេះដឹង រហូតបានក្លាយទៅជាអ្នកនិពន្ធនិងដឹកនាំរឿងវ័យក្មេងដ៏មានទេពកោសល្យ ។ ព្រីកា ក៏ជាកូនធម៌របស់លោក Scott Neeson ដែលជាប្រធានអង្គការដែលបានរើសយកពីគំនរសំរាមយកមកចិញ្ចឹមផងដែរ ។
ថ្មីៗនេះលោកបានបញ្ចេញនូវស្នាដៃដំបូងរបស់ខ្លួន តាមរយៈរឿង « រងចាំ » ដោយក្នុងរឿងនេះប្រជុំដោយតារាសម្តែងវ័យក្មេងជាច្រើនរូប ។ ព្រីកា រំពឹងថា ស្នាដៃដំបូងរបស់ខ្លួននឹងទទួលបានការគាំទ្រច្រើនពីសំណាក់ទស្សនិកជន ជាពិសេសការចូលរួមទស្សនារបស់បងប្អូនចំពោះរឿង « រង់ចាំ » គឺអាចជួយដល់កុមារកំព្រាដែលកំពុងខ្វះខាតផងដែរ ដោយសារតែលោកមានបំណងនឹងយកថវិការពីការលក់សំបុត្រយកទៅជួយដល់កុមារកំព្រានៅអង្គការ CCF ។
ជាមួយគ្នានេះ អ្នកស្រី សុខ ចាន់នឿន ដែលធ្លាប់បានជួយចិញ្ចឹម ព្រីកា តាំងពីក្មេងនិងរស់នៅគំនរសំរាមនោះ ក៏បានបង្ហាញនូវមោទនភាពខ្លាំងនៅពេលដែលឃើញ ព្រីកា អាចឈរជើង និងមានមុខមាត់ដូចសព្វថ្ងៃនេះ ។
គួរបញ្ជាក់ផងដែរថា តាមរយៈរូបភាពខ្លីដែលទស្សនិកជនឃើញ គឺជាទិដ្ឋភាពខ្លះក្នុងថ្ងៃសម្ពោធរឿង « រង់ចាំ » របស់លោក ព្រីកា កាលពីថ្ងៃទី ១៣ ខែ មករា កន្លងមកនេះ មើលទៅពិតជាព្រឺសប្បុរតែម្តងជាមួយការបង្ហាញនូវមន្តអាគមអូមអាមដ៏ព្រឺព្រួចនេះ ។ បើតាមគម្រោងរឿង « រង់ចាំ » នឹងដាក់បញ្ចាំងជាផ្លូវការចាប់ពីថ្ងៃទី ១៦ ខែ មករា នេះតទៅនៅគ្រប់រោងភាពយន្ត ។ តារាសម្តែងនៅក្នុងរឿងនេះក៏បានអំពាវនាវឱ្យទស្សនិកមកចូលរួមគាំទ្ររឿង « រង់ចាំ » ឱ្យបានច្រើនកុះករ ដើម្បីផ្តល់ជាកម្លាំងចិត្តក៏ដូចជាជួយដល់កុមារកំព្រានៅអង្គការ CCF ដែលកំពុងខ្វះខាត ពីព្រោះលោក ព្រីកា មានគម្រោងនឹងយកថវិការដែលបានពីការលក់សំបុត្រដើម្បីជួយដល់កុមារកំព្រាទាំងនោះ ។ កុំភ្លេចចូលរួមគាំទ្រស្នាដៃកូនខ្មែររូបនេះឱ្យបានច្រើន ៕
