លើកនេះលែងលេងសើចដូចលើកមុនហើយតារាចម្រៀង ទេព ពូព្រឹក្ស និងលោក ជី ដេវីត បានកំណត់ពីពេលវេលាច្បាស់សម្រាប់ថ្ងៃចូលរោងជ័យរបស់ខ្លួនហើយ បន្ទាប់ពីបានដើរកក់ហាង កក់សំអាងការ និងម្ហូបអាហារ ដើម្បីរៀបចំពិធីពិសេសរបស់ខ្លួន ។
តារាចម្រៀង ទេព បូព្រឹក្ស និងលោក ជី ដេវីត បានដឹកដៃគ្នាដើម្បីថតរូប Pre Wedding សារជាថ្មីម្តងទៀត ដើម្បីកំណត់ពីពេលវេលាដែលខ្លួនត្រូវចូលរោងការ ។ លោក ជី ដេវីត បានបង្ហោះសារនៅលើហ្វេសប៊ុកផ្លូវការរបស់លោកទៅកាន់មហាជនថា « ថ្ងៃជ័យថ្ងៃមង្គលរបស់យើងខ្ញុំបានកំណត់យកថ្ងៃទី០៧ ខែ មិថុនា ឆ្នាំ២០២៥ រយៈកាលកន្លងមកដែលបានកាន់ដៃគ្នាកសាងគ្រួសារ មួយពេញទៅដោយគុណភាពរក្សាចំណងស្នេហ៍ដោយភាពជឿជាក់រវាងគ្នានឹងគ្នាតស៊ូឆ្លងកាត់ព្យុះភ្លៀងរហូតអាចកាន់ដៃគ្នាមកដល់ចំណុចនេះ ។ សូមជូនដំណឹងអាពាហ៍ពិពាហ៍ដ៏រីករាយនេះទៅកាន់បងប្អូនទាំងអស់គ្នាដោយក្តីស្រលាញ់» ។
បន្ទាប់ពីឃើញលោក ជី ដេវីត ប្រកាសក្តែងៗបែបនេះ ទាំងមិត្តសិល្បៈក៏ដូចជាអ្នកគាំទ្រជាច្រើន បានផ្ញើសារជូនពរ និងរងចាំមើលពិធីមង្គលការដ៏អស្ចារ្យរបស់អ្នកទាំងពីរ ។
ពេលនេះ ទេព បូព្រឹក្ស និងលោក ជី ដេវីត កំពុងមមាញឹកនៅក្នុងការរៀបចំពិធីមង្គលការឱ្យសមមុខមាត់ មិនថាសំអាងការ ហាង ឬម្ហូបអាហារ គឺបានកក់ទុករួចរាល់ហើយ រងចាំថ្ងៃពិសេសមកដល់ប៉ុណ្ណោះ ។
មង្គលការរបស់ ទេព បូព្រឹក្ស និងលោក ជី ដេវីត ត្រូវបានមហាជនរំពឹងថាជាមង្គលការដ៏ធំនិងល្បីល្បាញបំផុតសម្រាប់ឆ្នាំ២០២៥ ពីព្រោះអ្នកទាំងពីរមិនត្រឹមតែជាតារាចម្រៀងល្បីឈ្មោះប៉ុណ្ណោះទេ ថែមទាំងមានទ្រព្យសម្បត្តិហូរហៀរ ដែលមានមហាជនជាច្រើនស្រឡាញ់ច្រើនបំផុត ។ ចាប់តាំងពីចាប់ដៃគ្នាធ្វើជាគូស្វាមីភរិយាមក អ្នកទាំងពីរបានឆ្លងកាត់នូវឧបសគ្គរាប់មិនអស់ រហូតសន្សំបានទ្រព្យសម្បត្តិយ៉ាងច្រើន មិនថា លុយកាក់ ផ្ទះវីឡា ដីធ្លី រថយន្តទំនើបៗ និងមុខជំនួញជាច្រើននៅក្នុងដៃ ជាពិសេសពេលចេញច្រៀងតាមការប្រគំតន្រ្តីរបស់ក្រុមហ៊ុនធំៗម្តង អ្នកទាំងពីរទទួលបានតម្លៃខ្ពស់កប់ពពក … ៕
