នៅសុខៗតារាសម្តែង នៅ សូនីតា បានពោលពាក្យទាំងអួលដើមកធ្វើអ្នកគាំទ្រជាច្រើនមានការស្រឡាំងកាំងនៅពេលដែលនាងហៅជីវិតរបស់ខ្លួនថា « អាពាហ៍ពិពាហ៍កំសត់ » ។
មកទល់ពេលនេះតារាសម្តែង នៅ សូនីតា បានសាងជីវិតគ្រួសារជាមួយលោក ទិត្យ ថាវរិទ្ធ អស់ពេលជាង៦ឆ្នាំហើយ ដោយទទួលបានចំណងដៃកូនប្រុសម្នាក់ ។ ក្នុងចន្លោះពេលនោះជីវិតគ្រួសារនាងមានបញ្ហារកាំរកូសច្រើន ស្ទើរតែមិនអាចរក្សាចំណងអាពាហ៍ពិពាហ៍នោះបាន ចំណែកស្វាមីនាងទើបតែដាក់ ទំនាក់ទំនងជាស្វាមីភរិយានិងគ្នាកាលពីពេលថ្មីៗនេះប៉ុណ្ណោះ ។
ទោះជាយ៉ាងណាថ្មីៗនេះតារាសម្តែង នៅ សូនីតា បានរៀបរាប់ពីទំហំចិត្តនិងបង្ហោះរូបភាពស្វីតស្វីតរបស់ខ្លួនថា « កាលពីស្នេហ៍គ្រាដំបូង ខ្ញុំនឹងរក្សា សុភមង្គល និងភាពស្មោះត្រង់ រហូតដល់ដង្ហើមចុងក្រោយនៃជីវិត ធ្មេចបើកៗជិតដល់ថ្ងៃអាពាហ៍ពិពាហ៍កំសត់របស់ពួកយើងទាំង២ គំរប់៦ឆ្នាំហើយ » ។
បន្ទាប់ពីឃើញតារាសម្តែង នៅ សូនីតា ហៅអាពាហ៍ពិពាហ៍របស់ខ្លួនថា ជាអាពាហ៍ពិពាហ៍កំសត់ បានធ្វើឱ្យមិត្តភក្តិក៏ដូចជាអ្នកគាំទ្រជាច្រើនមានអារម្មណ៍ក្តុកក្តួលចិត្តជំនួស តែទោះជាយ៉ាងណាម្នាក់ៗបានផ្ញើសារជូនពរនាងមានសុភមង្គលជារៀងរហូត …។
តារាសម្តែង នៅ សូនីតា កាន់តែផ្តាច់ខ្លួនឆ្ងាយពីសិល្បៈ បន្ទាប់ពីសាងជីវិតគូ ប៉ុន្តែរាល់ពេលមានកម្មវិធីថ្នាក់ជាតិ និងកម្មវិធីធំៗតែងតែមានវត្តមាននាងជានិច្ច ដើម្បីចូលរួមការរៀបចំ និងមើលការខុសត្រូវ ៕
