មិនត្រឹមតែជាតួល្ខោនយីកេវ័យក្មេងល្បីឈ្មោះប៉ុណ្ណោះទេ កញ្ញា កែវ សុផានិត ថែមទាំងជាគ្រូបង្ហាត់ខាងផ្នែកល្ខោនយីកេដ៏លេចធ្លោមួយរូបផងដែរ នៅសប្តាហ៍ក្រោយនេះនាងនឹងមានវត្តមានថ្មីនៅក្នុងល្ខោនបាមោជ្ជទ័យក្រោមផ្ទាំងទស្សនីយភាពរឿង « កុលាបប៉ៃលិន » ដែលបានបាត់បង់អស់ជាង២០ឆ្នាំមកហើយ ។
មានមហាជនតិចតួចណាស់ដែលស្គាល់ពី ល្ខោនបាមោជ្ជទ័យ ដោយសារល្ខោននេះត្រូវបានបាត់បង់អស់ពេលជាង២០ឆ្នាំហើយ តែទោះជាយ៉ាងណាក្រោយពីឆ្លងកាត់ការរៀបចំឆ្លងក្រសួងរួចរាល់ហើយ ល្ខោនបាមោជ្ជទ័យ និងត្រឡប់មកជួបទស្សនិកជនជាថ្មីម្តងទៀតជាមួយផ្ទាំងទស្សនីយភាពរឿង « កុលាបប៉ៃលិន » ចាប់ពីថ្ងៃទី២៣ដល់ថ្ងៃទី២៦ ខែមករា ឆ្នាំ២០២៥នៅសាលសន្នីសីទចតុម្មុខ ។
កញ្ញា កែវ សុផានិត មិនត្រឹមតែជាគ្រូល្ខោនយីកេប៉ុណ្ណោះទេ នាងគឺជាអ្នកសម្តែងល្ខោនយីកេដ៏ល្បីឈ្មោះមួយរូបដែលមានទេពកោសល្យខ្លាំងក្នុងការសម្តែង នាងត្រូវបានជ្រើសរើសសម្តែងជាតួអង្គសំខាន់នៅក្នុងល្ខោនបាមោជ្ជទ័យ ក្នុងរឿង « កុលាបប៉ៃលិន » ដោយល្ខោនបាមោជ្ជទ័យ បានបាត់បង់មិនមានការសម្តែងអស់ពេលជាង ២០ ឆ្នាំមកហើយ ។ នាងបានត្រៀមខ្លួនរួចរាល់ហើយដើម្បីបង្ហាញស្នាដៃថ្មីជូនបងប្អូនទស្សនាតាមរយៈរឿង « កុលាប៉ៃលិន » ។
ជាមួយគ្នានោះកញ្ញា កែវ សុផានិត ក៏បានសំណូមពរឱ្យមហាជនចូលរួមគាំទ្រវិស័យសិល្បៈបុរាណខ្មែរឱ្យបានច្រើន ។
មុននឹងការសម្តែងល្ខោនបាមោជ្ជទ័យរឿង « កុលាបប៉ៃលិន » មកដល់ ខាងនាយកដ្ឋានសិល្បៈទស្សនីយ៍ភាព និងក្រុមការងារផលិតនៃនាយកដ្ឋានសិល្បៈភាពយន្តនិងផ្សព្វផ្សាយវប្បធម៌ បានរួមគ្នាថតស្បតផលិតវិដេអូឯកសារល្ខោនបាមោជ្ជទ័យរឿង «កុលាបប៉ៃលិន » ដើម្បីផ្សព្វផ្សាយជូនសាធារណជន និងប្រជាជនខ្មែរឱ្យបានស្គាល់នូវទម្រង់ល្ខោនដ៏កម្រមួយនេះដែរ ហើយនៅមុនថ្ងៃសម្តែងមកដល់សិល្បករទាំងអស់ក៏ត្រៀមនឹងហាត់សមរួមគ្នាដើម្បីកុំឱ្យមានការភ្លាត់ស្នៀតនៅពេលសំដែង ។ កុំភ្លេចចូលរួមគាំទ្រ និងទស្សនាល្ខោនបាមោជ្ជទ័យក្នុងរឿង « កុលាបប៉ៃលិន » ទាំងអស់គ្នា ៕
