ជាង៤០ឆ្នាំក្នុងវិស័យសិល្បៈតារាកំប្លែងនាយ ចាបចៀន នៅតែប្រឹងធ្វើការលើវិស័យនេះរកប្រាក់ចិញ្ចឹមជីវិតគ្រួសារឱ្យដើរទៅមុខ បើទោះបីជាកូនទាំង៣នាក់របស់លោកពុំមានដុង និងអ្នកស្នងតំណែងពីលោកក្តី ។
តារាកំប្លែងនាយ ចាបចៀន បានិយាយថា លោកមិនបានជម្រុញកូនៗទាំង ៣ នាក់ឱ្យប្រលូកក្នុងវិស័យសិល្បៈដូចជាខ្លួនឡើយ ជាក់ស្តែងកូនស្រីច្បងរបស់លោកមានវ័យ ២៤ ឆ្នាំ បានបញ្ចប់ថ្នាក់បរិញ្ញប័ត្ររួចរាល់ហើយចំណែកប្រុសកូនទី២ មានវ័យ ២១ ឆ្នាំកំពុងសិក្សាថ្នាក់មហាវិទ្យាល័យឆ្នាំទី ៣ និងកូនស្រីពៅ កំពុងសិក្សាថ្នាក់ទី ៩ ហើយ លោកពិតជារីករាយណាស់នៅពេលដែលកូនៗចូលចិត្តការសិក្សា ។ នាយ ចាបចៀន ពិតជារំភើបចិត្ត និងមានមោទនភាពខ្លាំងចំពោះកូនៗទាំង ៣ នាក់ ពីព្រោះពួកគេសុទ្ធតែជាអ្នកសិក្សា និងបានពិន្ទុល្អនៅក្នុងការសិក្សាផងដែរ ។
នាយ ចាបចៀន បានបញ្ជាក់ប្រាប់ថា ជីវិតរបស់លោក គឺលោកចង់បង្ខំកូនៗឱ្យមកចាប់អាជីពសិល្បៈដូចជារូបលោកឡើយ ផ្ទុយទៅវិញលោកមានតែជម្រុញឱ្យពួកគេធ្វើអ្វីដែលខ្លួនចង់ធ្វើ ជាពិសេសលោកចង់ឱ្យកូនៗសិក្សាឱ្យបានខ្ពស់ និងយកជំនាញ និងចំណេះដឹងទាំងនោះទៅធ្វើការងារដែលពួកគេស្រឡាញ់ ឬជួយដល់ការងារសង្គមច្រើនជាង ។
ទោះបីជាបានតស៊ូក្នុងសិល្បៈជាង៤០ឆ្នាំមកហើយក្តីនាយ ចាប់ចៀន មិនស្តាយក្រោយនោះទេដែលកូនៗទាំង ៣ របស់លោកពុំមានដុងខាងសិល្បៈ ។ ជាមួយគ្នានេះផងដែរលោក ចាបចៀន ក៏បានចែករំលែកពីសុភមង្គលនៅក្នុងគ្រួសាររបស់លោកឱ្យមហាជនបានដឹងលឺផងដែរថា រាល់ពេលទំនេរពីការងារលោកតែងតែចំណាយពេលវេលាជុំគ្រួសារ ជាងជួបជុំមិត្តភក្តិ និងផ្តល់គំនិតល្អៗដល់កូនៗដើម្បីជាគ្រឹះត្រួសត្រាយជីវិតរបស់ពួកគេទៅថ្ងៃអនាគត ដូចដឹងស្រាប់ហើយថាធ្វើជាឪពុកម្តាយគេ គ្មានទ្រព្យសម្បត្តិច្រើនទុកឱ្យគេទេ មានផ្តល់ចំណេះដឹងប៉ុណ្ណោះដើម្បីអនាតរបស់ពួកគេ ៕
