នៅក្នុងវិស័យចម្រៀងនរណាដែលថាមិនស្គាល់ក្រុមចម្រៀង ហាយរ៉ុក នោះ ថ្វីដ្បិតតែពេលនេះក្រុមចម្រៀងនេះបានបាត់មុខពីពិភពគុណអស់ពេលជាច្រើនឆ្នាំ ប៉ុន្តែពេលនេះ ញឹម ចាន់ថន បានចេញមុខប្រកាថា នឹងគៀងគរតារាចម្រៀង ៣ នាក់រួមគ្នាឡើងវិញនៅក្នុងក្រុម ហាយរ៉ុក នៅក្នុងឆ្នាំ២០២៥ ។
ញឹម ចាន់ថន ធ្លាប់ជាតារាចម្រៀងនិងសម្តែងល្បីឈ្មោះមួយរូបកាលពីជាង១០ឆ្នាំមុន កេរ្តិ័ឈ្មោះរបស់នាងនៅក្នុងក្រុមចម្រៀង ហាយរ៉ុក នាពេលនោះពិតជាល្បីល្បាញខ្លាំងទាំងក្នុងនិងក្រៅប្រទេស ប៉ុន្តែគួរឱ្យស្តាយនៅពេលដែលកេរ្តិ៍ឈ្មោះកំពុងល្បីល្បាញ ស្រាប់តែក្រុមចម្រៀងនេះបែរជារំសាយចោលទៅវិញ ដោយម្នាក់ៗដើរផ្លូវរៀងៗខ្លួន ។
ជួបជាមួយ ញឹម ចាន់ថន កាលពីពេលថ្មីៗនេះ នាងបានបញ្ជាក់ប្រាប់ថា នៅក្នុងឆ្នាំ២០២៥ នេះ នាងត្រៀមនឹងប្រមូលក្រុមចម្រៀង ហាយរ៉ុក ឡើងវិញ ដើម្បីអុកឡុកពិភពគុណសារជាថ្មី ។ ពេលនេះនាងបានជួបជាមួយសមាជិកនៅក្នុងក្រុមចំនួន ២ នាក់ផ្សេងទៀតដូចជា ស៊ឹម ថៃណា និងលោក ហេងកាន់ឌី ជាដើម ពួកយើងបានធ្វើបទចម្រៀងរួចរាល់ហើយ ក្នុងនោះក៏មានក្បាច់រាំប្លែកៗជាច្រើនដែលត្រៀមនឹងមកអង្រួញបេះដូងអ្នកគាំទ្រជាថ្មីម្តងទៀត ។
ញឹម ចាន់ថន បានបន្ថែមទៀតថា ថ្វីដ្បិតតែនាងមិនបានដឹងពីសន្ទុះនៃការគាំទ្រពីសំណាក់ទស្សនិកជនដល់កម្រិតណា ប៉ុន្តែមានអ្នកគាំទ្រជាច្រើនបានផ្ញើសារឱ្យនាងនិងក្រុមចម្រៀង ហាយរ៉ុក ចាប់ដៃគ្នាឡើងវិញឆាប់ៗ ។ ដោយមានកម្លាំងចិត្តពីអ្នកគាំទ្រច្រើន ធ្វើឱ្យនាងនិងមិត្តរួមក្រុមកាន់តែមានកម្លាំងចិត្ត ដើម្បីបង្ហាញនូវស្នាដៃថ្មីៗរបស់ខ្លូន ។
ទស្សនិកជន នឹងបានឃើញស្នាដៃក្រុមចម្រៀង ហាយរ៉ុក ឡើងវិញក្នុងពេលឆាប់ៗខាងមុខនេះហើយ ជាមួយបទចម្រៀងថ្មី ស្ទាយថ្មី និងក្បាច់រាំប្លែកៗ បើទោះបីជាពួកគេមានវ័យច្រើនបន្តិចក្តី ប៉ុន្តែពួកគេបានប្តេជ្ញាចិត្តកសាងកេរ្តិ៍ឈ្មោះក្រុម ហាយរ៉ុក ឡើងវិញ ៕
