ថ្មីៗនេះពិធីការិនី ហ៊ិន ច័ន្ទនីរ័ត្ន ឧស្សាហ៍ញុំាម្ជុរខុសប្លែកពីធម្មតា ដែលជាហេតុធ្វើឱ្យអ្នកគាំទ្រជាច្រើនគិតថា នាងកំពុងមានផ្ទៃពោះ ជាពិសេសនាងបានតុបតែងខ្លួននិងស្លៀកពាក់ប្រៀបដូចជាអ្នកមានផ្ទៃពោះអីចឹង ។
ទន្ទឹមនិងការសង្ស័យនេះ ហ៊ិន ច័ន្ទនីរ័ត្ន តែងតែឆ្លើយតបទៅមិត្តភក្តិរបស់ខ្លួនថា កូនដំបូងនេះ មិនថាកូនប្រុសឬកូនស្រី គឺនាងស្រឡាញ់ទាំងអស់ មិនប្រកាន់ទេ ។ ចំណែកស្វាមីនាងវិញក៏គិតបែបនេះដែរ ។ ជាក់ស្តែងតាមរយៈវិដេអូដែលមិត្តភក្តិរបស់នាងបានថតកាលពីចូលរួមង្គលការរបស់ សុភ័ក្រ្ត កុសុម៉ា គឺ ហ៊ិន ច័ន្ទនីរ័ត្ន បានបង្ហាញនូវអារម្មណ៍រីករាយនិងនិយាយពីរឿងមានកូនដំបូងទៅកាន់មិត្តភក្តិ យ៉ាងរីករាយបំផុត ។ ទាំងមិត្តសិល្បៈក៏ដូចជាអ្នកគាំទ្រ បានផ្ញើសារជូនពរនាងគ្រប់ៗគ្នា ។
ចាប់តាំងពី ហ៊ិន ច័ន្ទនីរ័ត្ន មានផ្ទៃពោះ នាងកាន់តែទទួលបានការស្រឡាញ់ថ្នាក់ថ្នមពីស្វាមីរបស់ខ្លួនទ្វេរដង នាងតែងតែចេញវិដេអូផ្សេងៗជាមួយស្វាមីដើម្បីចែករំលែកឱ្យអ្នកគាំទ្រមើល ។ អ្នកដែលបានចូលមើលវិដេអូរបស់នាងហើយតែងតែច្រណែននិងវាសនារបស់នាងគ្រប់ៗគ្នា ។
ទោះបីជា ហ៊ិន ច័ន្ទនីរ័ត្ន រៀបការមានគ្រួសារ ថែមទាំងមានផ្ទៃពោះទៀតក្តី នាងនៅតែបន្តការងារជាពិធីកររបស់ខ្លួនដូចដើម គ្រាន់តែពេលនេះនាងកាត់បន្ថយការងារជាងមុន ដោយសារចង់ទុកពេលវេលាជាមួយគ្រួសារឱ្យបានច្រើន ។
