ខណៈ ប្រាសាទ ដាវីន កំពុងផ្ទុះការចាប់អារម្មណ៍នៅលើឆាកអន្តរជាតិ សមាគមសិល្បករខ្មែរបានជម្រុញឱ្យបងប្អូនចូលរួមបោះឆ្នោតដល់បេក្ខភាព កម្ពុជា ឱ្យបានច្រើន ដើម្បីកម្ពុជា មានឱកាសឡើងទៅ Top សំខាន់ៗ ។
វត្តមាន ប្រាសាទ ដាវីន នៅលើទឹកដី ម៉ិកសិកកូ ដើម្បីដណ្តើមមកុដ Miss Universe ឆ្នាំ ២០២៤ ពិតជាទទួលបានការចាប់អារម្មណ៍ខ្លាំងពីសំណាក់អ្នកគាំទ្រជាតិ និង អន្តរជាតិ ជាក់ស្តែង សកម្មភាពរបស់នាងទាំងអស់ បានធ្វើឱ្យគណគម្មការពេញចិត្ត ថែមទាំងបានកត់សម្គាល់ទុកផងដែរ ទាំងការរៀបចំខ្លួន ការស្លៀកពាក់ ការទំនាក់ទំនង និងការនិយាយស្តីជាដើម…។
ប្រាសាទ ដាវីន គឺជាបេក្ខភាពតំណាង កម្ពុជា ដ៏មានសមត្ថភាព ទាំងរូបសម្រស់ ចំណេះដឹង ការដើរម៉ូដ និងបទពិសោធជាច្រើននៅក្នុងខ្លួន បានធ្វើឱ្យនាងអាចឈរជើងលើឆាកអន្តរជាតិមួយនេះ ដោយគ្មានការភ័យព្រួយបារម្ភ ។ ដូចមហាជនដឹងស្រាប់ហើយថា មុនឡើងយន្តហោះចេញទៅប្រកួត នាងបានបង្ហាញនូវការជឿជាក់ និងប្តេជ្ញាចិត្តធ្វើឱ្យអស់ពីសមត្ថភាពដែលខ្លួនមាន ដើម្បីនាំ កម្ពុជា ទៅកាន់ឆាកដ៏អស្ចារ្យនេះ ។
ជាមួយនិងការត្រៀមខ្លួនចូលរួមប្រកួតនូវវគ្គសំខាន់ៗនេះ ប្រាសាទ ដាវីន ត្រូវបានប្រជាជន កម្ពុជា ទាំងក្នុងនិងក្រៅប្រទេសចូលរួមលើកទឹកចិត្ត និងផ្តល់កម្លាំងចិត្តយ៉ាងធំធេងសម្រាប់នាងក្នុងការប្រកួតនេះ សូម្បីតែខាង សមាគមសិល្បករខ្មែរ ក៏មិនអោបដៃឈរមើលដែរ ដោយសមាគមបានជម្រុញឱ្យ ចូលរួមបោះឆ្នោតសម្រាប់បេក្ខភាព កម្ពុជា ឱ្យបានច្រើន ។
សមាគមសិល្បករខ្មែរបានចេញសារថា « យើងពិតជាមានមោទកភាពចំពោះវត្តមានរបស់កញ្ញាឯកចក្កវាឡកម្ពុជាអ្នកនាង ប្រាសាទ ដាវីន ដែលកំពុងតំណាងជាតិចូលរួមប្រកួតក្នុងកម្មវិធី បវរកញ្ញាចក្កវាឡលើកទី៧៣ ឆ្នាំ២០២៤ លើទឹកដីប្រទេសម៉ិចស៊ិច ។ ជាការកត់សម្គាល់ រយៈពេលមួយសប្តាហ៍នេះ បវរកញ្ញាចក្កវាឡកម្ពុជា ប្រាសាទ ដាវីន ធ្វើបានយ៉ាងល្អ និងមានការគាំទ្រច្រើននៅប្រទេស Mexico។ ទោះបីជាយ៉ាងណា នៅក្នុងកាលៈទេសៈនេះ តំណាងកម្ពុជា កំពុងទាមទារនូវការជួយជ្រោមជ្រែងពីសំណាក់មហាជនខ្មែរទូទៅ តាមរយៈការបោះឆ្នោត(Vote) ដោយផ្ដោតសំខាន់លើការងារសង្គមដែល បវរកញ្ញា ប្រាសាទ ដាវីន បានធ្វើកន្លងមក ។ ការបោះឆ្នោតនេះ នឹងជួយឱ្យយើងអាចទទួលបានជ័យលាភីពានមាស និងប្រាក់ ក្នុងចំណោមប្រទេសទាំង១០ សម្រាប់ការងារសប្បុរសសម្រាប់ការអភិវឌ្ឍប្រកបដោយចីរភាព។ ការបោះឆ្នោតរបស់បងប្អូន គឺពិតជាសំខាន់ ដើម្បីឱ្យកម្ពុជាទទួលបានពានរង្វាន់ Top10 Voice for Change »។
ទន្ទឹមនិងការចេញសារនេះ ក៏មានសិល្បករសិល្បការិនី និង អ្នកគាំទ្រ កម្ពុជា ច្រើនក៏បានផ្ញើសារជូនពរ និងបោះឆ្នោតសម្រាប់អ្នកនាង ប្រាសាទ ដាវីន ក្នុងការប្រកួតនៅលើឆាកអន្តរជាតិមួយនេះផងដែរ ៕
