កំពុងបញ្ចេញក្បាច់រាំញ័រញាក់នៅលើឆាកសុខៗ ស្រាប់តែ ព្រះកាយច័ន្ទ ដើរបែរខ្នង ដើម្បីខ្ទប់អាវរបស់ខ្លួនយ៉ាងចម្លែក ធ្វើឱ្យអ្នកចូលរួមទស្សនានាថ្ងៃនោះភ្ញាក់ផ្អើលគ្រប់ៗគ្នា ។ ទោះជាយ៉ាងណានាងបានទទួលស្គាល់ថាខ្លួនពិតជារហែកអាវមែន នេះជារឿងដែលគួរឱ្យខ្មាស់គេបំផុតជិត ២០ ឆ្នាំក្នុងសិល្បៈ ។
ជិត ២០ ឆ្នាំក្នុងសិល្បៈ ព្រះកាយច័ន្ទ មិនដែលភ្លាត់ស្នៀតក្នុងការសម្តែងម្តងណាឡើយ ទើបតែនៅក្នុងកម្មវិធីជប់លៀងសម្ពោធហាងរបស់មិត្តសិល្បៈកាលពីប៉ុន្មានថ្ងៃនេះ ស្រាប់តែនាងភ្លាត់ស្នៀតបញ្ចេញក្បាច់ខុស រហូតដល់ថ្នាក់រហែកអាវទាំងកណ្តាលហ្វូងមហាជន ។ កញ្ញា ព្រះកាយច័ន្ទ បានទទួលស្គាល់ថា នាងពិតជាភ្លាត់ស្នៀតធ្វើឱ្យរហែកអាវយ៉ាងពិតប្រាកដមែន រយៈពេលជិត ២០ ឆ្នាំមកនេះ នាងមិនធ្លាប់បានជួបរឿងបែបនេះទេ សំណាងល្អក្នុងថ្ងៃនោះមិនមានអ្វីធំដុំឡើយ គឺនាងបានខ្ទប់អាវជាប់ ទោះបីជាពេលនោះនាងភ័យ និងបានភ្លេចភ្លាំងក្បាច់រាំ តែនាងបានប្រឹងសម្តែងរហូតដល់ចប់ ។
កញ្ញា ព្រះកាយច័ន្ទ បានចាត់ទុកថា ហេតុការណ៍ដ៏អាក្រក់នេះគឺជាបទពិសោធថ្មីមួយសម្រាប់ខ្លួននៅពេលដែលចេញសម្តែងៗ ត្រូវមានការប្រុងប្រយ័ត្ន និងឆែកមើលឱ្យបានគ្រប់ជ្រុងជ្រោយមុននឹងឡើងឆាក ។
កញ្ញា ព្រះកាយច័ន្ទ កាន់តែមានទំនុកចិត្តលើរូបសម្រស់របស់ខ្លួន បន្ទាប់ពីបានវះកាត់កែខ្ទង់ច្រមុះថ្មី បន្ថែមហុងស៊ុយថ្មី ជាពិសេសនាងចាប់ផ្តើមលេចមុខខ្លាំងក្នុងការសម្តែងបទចម្រៀង និងក្បាច់រាំ នៅក្នុងកម្មវិធីធំៗជាច្រើន ។ នាងថា នាងត្រូវប្រឹងប្រែងធ្វើការងារដើម្បីរកប្រាក់ចំណូលចិញ្ចឹមជីវិត ៕
