កាលពីថ្ងៃទី ០៨ ខែ សីហា ឆ្នាំ ២០២៤ កន្លងមកនេះ សម្តេចមហារដ្ឋសភាធិការធិបតី ឃួន សុដារី បានជួបនិងសំណេះសំណាល ផ្តល់អនុសាសន៍ដល់គណៈប្រតិភូសមាគមសិល្បករ ខ្មែរ ដឹកនាំដោយអ្នកឧកញ៉ា ម៉ៅ ចំណាន ប្រធានសមាគមសិល្បរ ខ្មែរ ។ សម្តេចមហារដ្ឋសភាធិការធិបតី ឃួន សុដារី ថែមទាំងបានឧបត្ថម្ភថវិកា ២០លានរៀល ជូនអ្នកឧកញ៉ា ម៉ៅ ចំណាន ក្នុងជួបសម្តែងការគួរសម និងពិភាក្សាការងារនោះ ។
លោកជំទាវអ្នកឧកញ៉ា ប្រធានសមាគមសិល្បករខ្មែរ បានជម្រាបជូនសម្ដេចប្រធានរដ្ឋសភា ថា អ្នកឧកញ៉ា ពិតជាមានឆន្ទៈ និងការប្តេជ្ញាចិត្តយ៉ាងមុតមាំក្នុងការជួយជំរុញលើកស្ទួយ អភិរក្ស និងអភិវឌ្ឍន៍វិស័យសិល្បៈវប្បធម៌ខ្មែរដ៏ល្អផូរផង់ ឱ្យកាន់តែមានកិត្យានុភាពបន្ថែមទៀតទាំងលើឆាកជាតិ និងអន្តរជាតិ ក្រោមការដឹកនាំ និងចង្អុលបង្ហាញរបស់រាជរដ្ឋាភិបាលកម្ពុជា ។
ឆ្លៀតក្នុងឱកាសនោះ អ្នកឧកញ៉ា ម៉ៅ ចំណាន បានសម្តែងការកោតសរសើរចំពោះសម្តេចមហារដ្ឋសភាធិការធិបតី ដែលជាស្ត្រីពោរពេញដោយសមត្ថភាព មានភាពលេចធ្លោរខ្លាំងទាំងក្នុងឆាកនយោបាយ និងកិច្ចការសង្គម គឺជាធនធានមនុស្សដ៏កម្របំផុតរបស់កម្ពុជា ពិសេស ជានិមិត្តរូបរបស់ស្ត្រី កម្ពុជា។ សម្តេចបានកសាងសមិទ្ធផល និងស្នាដៃដ៏ត្រចះត្រចង់ជាច្រើនទសវត្សរ៍ក្នុងស្ថាប័ននីតិប្បញ្ញត្តិ រហូតត្រូវបានរដ្ឋសភា បោះឆ្នោតផ្តល់សេចក្តីទុកចិត្ត ឱ្យក្លាយជាប្រធានរដ្ឋសភា សម្រាប់នីតិកាលទី៧នេះ និងជាស្រ្តីដំបូងគេក្នុងប្រវត្តិសាស្ត្រថ្នាក់ដឹកនាំកំពូលរបស់ស្ថាប័ននីតិប្បញ្ញត្តិមួយនេះ។
ស្របពេលជាមួយគ្នានោះផងដែរ សម្តេចរដ្ឋសភាធិការធិបតី ក៏បានផ្តល់អនុសាសន៍ចំនួន ៧ចំនុចសំខាន់ៗ ជូនដល់ អ្នកឧកញ៉ា ម៉ៅ ចំណាន ប្រធានសមាគមសិល្បករ ខ្មែរ ដើម្បីលើកកម្ពស់ និងអភិរក្សសិល្បៈវប្បធម៌ផងដែរ ។
សម្តេចមហារដ្ឋសភាធិការធិបតី ឃួន សុដារី បានឧបត្ថម្ភថវិកា ២០លានរៀល ជូនអ្នកឧកញ៉ា ម៉ៅ ចំណាន ក្នុងជួបសម្តែងការគួរសម និងពិភាក្សាការងារ ដើម្បីជាការលើកទឹកចិត្តនៅក្នុងដំណើរការសមាគមសិល្បករខ្មែរ ឱ្យកាន់តែរលូន និងល្អប្រសើរថែមទៀត ៕
