ពិតជាប្លែកខ្លាំងណាស់ បន្ទាប់ពីទទួលពានរង្វាន់នៅប្រទេស សឹង្ហបុរី ភ្លាម តារាសម្តែងដ៏មានប្រជាប្រិយភាព ស៊ីន យូប៊ីន បានពោលពាក្យ អរគុណចំពោះអ្នកស្អប់ ដែលបានជំរុះឱ្យនាងឈានជើងដូចសព្វថ្ងៃនេះ ។
ស្របពេលដែលតារាសម្តែង ស៊ីន យូប៊ីន បានបង្ហាញវត្តមាននៅលើឆាកអន្តរជាតិនៅក្នុងទីក្រុង កាន ប្រទេស បារាំង នាពេលកន្លងមកនាងទទួលបានទាំងការសរសើរ និង ការរិះគន់ ប៉ុន្តែការរិះគន់ដ៏ខ្លាំងៗនោះបានធ្វើឱ្យ ស៊ីន យូប៊ីន ក្តៅឆេះឆួលក្នុងចិត្តមិនតិចទេ តែនាងព្យាយាមសម្រួលចិត្ត និងបកស្រាយតាមធម្មតាៗ …។
ដោយឡែកនៅពេលដែលចេញទៅទទួលពានរង្វាន់នៅប្រទេស សឹង្ហបុរី នៅក្នុងកម្មវិធី The HOFS Award 2024 ស្រាប់តែ ស៊ីន យូប៊ីន បានបង្ហោះសារដោយបង្កប់ដោយអត្ថន័យជ្រាលជ្រៅថា «
Inspirational women hall of fame award ពានរង្វាន់នេះផ្តល់ដល់អ្នកដែលមានទេពកោសល្យច្រើនផ្នែកនិងមានសមិទ្ធិផលការងារដែលគេទទួលស្គាល់ច្រើន ព្រមទាំងជាបុគ្គលដែលធ្វើជាគំរូរដល់អ្នកដទៃ ។ នេះជាលើកទីពីរហើយសម្រាប់ខ្ញុំដែលបានឈរលើឆាកដ៏មានកិត្យានុភាពនេះ។ សូមថ្លែងអំណរគុណចំពោះ HOFS ប្រទេសសឹង្ហបុរី ដែលផ្តល់កិត្តិយសដល់ខ្ញុំ និងបានឃើញការខិតខំប្រឹងប្រែង និងសមិទ្ធផលការងាររបស់ខ្ញុំកន្លងមកពានរង្វាន់នេះមានន័យណាស់សម្រាប់ខ្ញុំ។ អរគុណ hater អ្នកបានរួមចំណែកជួយខ្ញុំជោគជ័យរហូតដល់ចំណុចនេះរាល់ជំហាននៃភាពជោគជ័យរបស់ខ្ញុំគឺបានមកពីពាក្យរិះគន់របស់អ្នក ការរើសអើង និងការស្អប់របស់អ្នក ព្រោះខ្ញុំយកវាជាការលើកទឹកចិត្ត និងរំលឹកខ្លួនឯងគ្រប់ពេលអោយខិតខំមិនខ្លាចហត់នឿយឡើយ។ កាន់តែថាខ្ញុំកាន់តែធ្វើខ្ញុំកាន់តែជោគជ័យ អរគុណ »។
កញ្ញា ស៊ីន យូប៊ីន គឺជាតារាសម្តែងល្បីឈ្មោះមួយរូបដែលបាននាំ កម្ពុជា ទៅលើឆាកអន្តរជាតិ ច្រើនជាងគេ ហើយនាងក៏បានធ្វើឱ្យពិភពលោកកាន់តែស្គាល់ កម្ពុជា ច្រើនឡើង ។ កញ្ញា ស៊ីន យូប៊ីន នៅតែអះអាងថា នាងនឹងប្រឹងប្រែងធ្វើការងារដែលផ្តល់ប្រយោជន៍ដល់សង្គមជាតិ ទៅតាមលទ្ធភាពដែលខ្លួនមាន ៕
