ការបោះឆ្នោតជ្រើសរើសប្រធានសមាគមសិល្បករ ខ្មែរ អាណត្តិទី ៦ នេះនឹងប្រព្រឹត្តិទៅនៅថ្ងៃទី២ ខែឧសភា ឆ្នាំ២០២៤ ស្អែកនេះហើយ ដោយមានសមាជិកជាសិល្បករចូលរួមបោះឆ្នោតចំនួន ៦០០ នាក់ ក្នុងនោះដែរបេក្ខភាពដែលឈរឈ្មោះជាប្រធានសមាគមសិល្បករ មានចំនួន ៣ រូបសុទ្ធតែជាជើងខ្លាំងនៅក្នុងពិភពសិល្បៈ ។
លោក គួច ខេវិន លោក ផាត់ តារារ័ត្ន និងអ្នកឧកញ៉ា ម៉ៅ ចំណាន គឺជាបេក្ខភាពខ្លាំងទាំង ៣ នាក់ដែលត្រូវបានគណកម្មការរៀបចំការបោះឆ្នោត ក្រោមការជ្រោមជ្រែងរបស់ក្រសួងវប្បធម៌ និង វិចិត្រសិល្បៈជ្រើសរើសជាបេក្ខភាពឱ្យឈរឈ្មោះជាប្រធាន សមាគមសិល្បករ ខ្មែរ នៅក្នុងអណត្តិទី ៦ នេះ ដោយការបោះឆ្នោតនេះគឺស្ថិតក្នុងរង្វង់អ្នកសិល្បៈជាលក្ខណៈទ្រង់ទ្រាយធំ ។ ការបោះឆ្នោតនេះនឹងរៀបចំឡើងនៅ រាជបណ្ឌិតសភា កម្ពុជា ម្តុំពោធចិនតុង ។ ក្នុងចំណោមបេក្ខភាពខ្លាំងខាងលើនេះគឺមានតែលោកគួច ខេវិន ម្នាក់ប៉ុណ្ណោះដែលធ្លាប់ដឹកនាំសិល្បៈរយៈពេលជាង២០ឆ្នាំមកហើយ ។
លោក គួច ខេវិន បានបញ្ចប់ការសិក្សាថ្នាក់ អនុបណ្ឌិតផ្នែក វប្បធ៌មនិងទស្សនវិជ្ជា នៅសកលវិទ្យាល័យ ណតអ៊ីស្ទ័ននៃ សហរដ្ឋអាមេរិក និងអាចប្រើប្រាស់ភាសាបានដល់ទៅ ៥ ភាសាឯណោះ ដូចជា ភាសា ខ្មែរ ចិន វៀតណាម បារាំង និង អង់គ្លេស ។ លោកបានវិលត្រឡប់មកបំរើមាតុភូមិ និងប្រជាជនខ្មែរវិញចាប់ពីឆ្នាំ១៩៩២ តាមរយៈអង្គការសហប្រជាជាតិUNAMICនិងUNTACព្រមទាំងអង្គការមនុស្សធ៌មក្រៅរដ្ឋាភិបាលជាច្រើនទៀត ។ រយៈពេលជាង៣០ឆ្នាំកន្លងទៅ លោកបានធ្វើការងារជាអ្នកដឹកនាំ ផលិតកម្មវិធីទូរទស្សន៍ឯកជន ជាច្រើននៅក្នុងប្រទេស និងផលិតវីដេអូ របាំព្រះរាជទ្រព្យ អាយ៉ៃ និងបទចម្រៀងជាច្រើនផ្សព្វផ្សាយ ទៅក្រៅប្រទេស។
លោកគួច ខេវិន បានបង្ហាញជំហថា ប្រសិនបើលោកជាប់ជាប្រធានសមាគមលោកនឹងពាំនាំយក សិល្បៈទៅផ្សព្វផ្សាយលើឆាកអន្តរជាតិ និងធ្វើឲ្យសិល្បៈខ្មែរមានភាពថ្លៃថ្នូរ ព្រមទាំងមិនប្រកាន់ ឬរើសអើងចំពោះភេទទី៣ ឡើយ ។
លោក ផាត់ តារារដ្ឋ គឺជាស្ថាបនិកគ្រួសារតារា កម្ពុជា និងជាចាងហ្វាងសារព័ត៌មាន ផ្ទះតារា ។ មិនតែប៉ុណ្ណោះលោកក៏ជាសាស្រ្តាចារ្យអក្សរសាស្រ្ត ខ្មែរ និង ប្រវត្តិវិទ្យា ដែលធ្លាប់បានចូលរួមការងារសង្គម និងបណ្តុះបណ្តាលធនធានមនុស្សជាច្រើន ។
ចំណែកអ្នកឧកញ៉ា ម៉ៅ ចំណាន ឬ ស្រីតូច ចំណាន វិញក៏ជាបេក្ខភាពខ្លាំង និងមានប្រជាប្រិយភាពខ្លាំងជាងគេ ព្រោះលោកជំទាវក៏ជាអតីតតារាសម្តែង និងជាពិធីការិនីល្បីឈ្មោះមួយរួបផងដែរកាលពី ២០ ឆ្នាំមុន ។ បច្ចុប្បន្នលោកជំទាវគឺជាអ្នកគ្រប់គ្រង និងជាអ្នកដឹកនាំមានមុខមានមាត់ក្នុងសង្គម ។
សម្រាប់សិល្បករទាំង ៦០០ នាក់ដែលបានចុះឈ្មោះបោះឆ្នោតក្នុងការជ្រើសរើសប្រធានសមាគមថ្មី នៅថ្ងៃស្អែកនេះ បានត្រៀមខ្លួនរួចរាល់ហើយ ដើម្បីទៅបោះឆ្នោតជ្រើសរើសបេក្ខភាពដែលខ្លួនស្រឡាញ់ពេញចិត្ត ។ ក្នុងចំណោមបេក្ខភាពទាំង ៣ នាក់ខាងនេះ មិនដឹងថា បេក្ខភាពណាម្នាក់នឹងក្លាយទៅជាប្រធានសមាគមថ្មីនៅក្នុងអណត្តិទី ៦ នេះទេ ដូច្នេះមានតែរងចាំមើលទាំងអស់គ្នា ៕
