តារាសម្តែង សួង ស៊ីធឿន ហាក់បីដូចជាមិនអើរពើចំពោះរឿងរៀបការសោះ ខណៈពេលដែលគូដណ្តឹងចង់រៀបការឆាប់ៗ ។
តារាសម្តែង សួង ស៊ីធឿន បានភ្ជាប់ពាក្យជាគូស្នេហ៍ខ្លួនជាងមួយឆ្នាំហើយ បន្ទាប់ពីបានស្គាល់និងទំនាក់ទំនងគ្នាអស់ពេលជាង៥ឆ្នាំ កន្លងមក សួង ស៊ីធឿន ធ្លាប់បាននិយាយថា កញ្ញានឹងរៀបការនៅពេលដែលអាជីវកម្មថ្មីរបស់នាងដំណើរការល្អ ។
ស្របពេលជាមួយគ្នានេះផងដែរ អាជីវកម្មបើកផ្ទះសំណាក់របស់តារាសម្តែង សួង ស៊ីធឿន បានដំណើរការល្អតាមគម្រោងដែលបានគ្រោងទុក រហូតដល់ពង្រើកសាខាជាច្រើនកន្លែងទាំងនៅទីក្រុង និងតាមបណ្តាខេត្តមួយចំនួន ប៉ុន្តែតារាស្រីរូបនេះ នៅតែពុំទាន់ដឹកដៃគូស្នេហ៍ចូលរោងការទៀត ។
បើតាមប្រភពព័ត៌មានពីអ្នកសិទ្ធជាមួយតារាសម្តែង សួង ស៊ីធឿន បានបង្ហើបប្រាប់ថា គូដណ្តឹងរបស់ សួង ស៊ីធឿន ចង់រៀបការឆាប់ៗដើម្បីបំពេញបំណងគ្រួសារ ប៉ុន្តែ សួង ស៊ីធឿន បែរជាសុំពន្យាពេលទៅវិញ ។
ជួបជាមួយតារាសម្តែង សួង ស៊ីធឿន កាលពីពេលថ្មីៗនេះបានបញ្ជាក់ប្រាប់ថា រឿងរៀបការគង់តែរៀបចំឡើងទេ តែពេលនេះសុំពន្យាពេលទៀតសិន ដោយសារការងាររកស៊ីកំពុងជោគជ័យ មិនចង់ឱ្យឱកាសល្អនេះកន្លងហួសទៅឡើយ ចង់សន្សំលុយឱ្យបានច្រើនជាងនេះសិន ទុកសម្រាប់រៀបចំពិធីមង្គលការរបស់ខ្លួនដោយមិនចាំបាច់ពឹងពាក់លើគ្រួសារ ។
សួង ស៊ីធឿន មានបំណងចង់រៀបចំពិធីមង្គលការខ្លួនដែលមានលក្ខណៈធំដុំ និងមានមិត្តភក្តិក្នុងនិងក្រៅសិល្បៈជាច្រើនចូលរួមអបអរសាទរ យ៉ាងយូរ ឆ្នាំក្រោយនាងសម្រេចចិត្តរៀបការហើយ ដោយសារមិនចង់ឱ្យគូដណ្តឹងរងចាំយូរ ។
សួង ស៊ីធឿន ក៏ជាតារាសម្តែងលេចធ្លោមួយរូបដែលធ្លាប់លេចមុខក្នុងរឿងដុំច្រើនជាងរឿងភាគ បើទោះបីជាពេលនេះកញ្ញារវល់មើលការងាររកស៊ីរបស់ខ្លួនក្តី កញ្ញានៅតែឆ្លៀតពេលថតរឿង ដើម្បីបន្សល់ទុកនូវស្នាដៃល្អសម្រាប់កូនចៅជំនាន់ក្រោយៗ ៕
