គ្រាន់តែចប់ចូលឆ្នាំថ្មីប្រពៃណីខ្មែរភ្លាម យើងអាចនិយាយបានថាបទចម្រៀងល្បីៗទាំង៧បទរបស់កំពូលតារាចម្រៀង ខេមរៈ សិរីមន្ត ពិតជាផ្ទុះខ្លាំងក្នុងអំឡុងបុណ្យចូលឆ្នាំថ្មី ។
ក្នុងអំឡុងបុណ្យចូលឆ្នាំថ្មីប្រពៃណីខ្មែរ កំពូលតារាចម្រៀង ខេមរៈ សិរីមន្ត បានសម្រុកចេញបទចម្រៀងចំនួន៧បទជាប់ៗគ្នាមានគ្រប់រសជាតិ ជាក់ស្តែងបន្ទាប់ពីចូលឆ្នាំរួចរយៈពេល៣ថ្ងៃ គេសង្កេតឃើញថា បទចម្រៀងរបស់លោកទាំងថ្មីទាំងចាស់បានធ្វើឱ្យកក្រើកឆាកតន្រ្តី ក៏ដូចជាពេញនិយមចាក់ និងរាំលេងកម្សាន្តយ៉ាងខ្លាំងពីសំណាក់ពុកម៉ែបងប្អូនទាំងនៅទីក្រុង និងតាមបណ្តាខេត្តនានា និងសុះសាយដល់ក្រៅប្រទេសផងដែរ ។
បទចម្រៀងរបស់កំពូលតារាចម្រៀង ខេមរៈ សិរីមន្ត ទាំង៧បទនោះរួមមានបទ « សៅអើយនាងសៅ » « Khmer Vibe » « ឆ្នាំនឹងសៀមរាបសប្បាយខ្លាំង » « តាលុងខេមរៈខ្មែរ West Side » « កាត់ជើងគ្រុំក្រមុំជើងអក » « ទៅឬមិនទៅ » និងបទ «« អូលេងបងបាត់ » ជាដើម…។ មិនតែប៉ុណ្ណោះបទចម្រៀងពីមុនៗរបស់លោកដូចជាបទ « ដង្ខៅក្របី » កាឡុកក្រឡុក » «អ្នកស្រែក៏មានដុល្លារ » ក៏ផ្ទុះឡើងវិញពេញផ្ទៃប្រទេស និងប្រទេសជិតខាងដូចជា ថៃ វៀតណាម ផងដែរ ។
គួរបញ្ជាក់ផងដែរថា បទចម្រៀងរបស់កំពូលតារាចម្រៀង ខេមរៈ សិរីមន្ត នៅក្នុងផលិតកម្ម ហ្គាឡាក់ស៊ី ណាវ៉ាត្រា តែងតែនាំមុខគេជានិច្ច ក្នុងរដូវកាលចូលឆ្នាំថ្មីប្រពៃណីខ្មែរ អស់រយៈពេលជាង ២០ ឆ្នាំមកនេះ ដោយសារតែបទចម្រៀងរបស់លោកផលិតឡើងយ៉ាងមានគុណភាព ទាំង សាច់ភ្លេង ទំនុកច្រៀង ជាពិសេសសម្លេងរបស់លោក គឺបត់បែនបានគ្រប់កាលៈទេសៈ ៕
