គណៈប្រតិភូជាន់ខ្ពស់ នៃប្រទេសលុចសំបួ ដឹកនាំដោយព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ និងអមដំណើរដោយឯកឧត្តម Xavier Bettel ឧបនាយករដ្ឋមន្រ្តី រដ្ឋមន្ត្រីការបរទេស ពាណិជ្ជកម្មបរទេស កិច្ចសហប្រតិបត្តិការអភិវឌ្ឍន៍ កិច្ចការមនុស្សធម៌នៃប្រទេសលុចសំបួ បានទស្សនកិច្ចនៅមន្ទីរពេទ្យគន្ធបុប្ផា នៅថ្ងៃទី២ ខែមេសា ឆ្នាំ២០២៥ ។
លោកវេជ្ជបណ្ឌិត Denis Laurent អគ្គនាយកមូលនិធិមន្ទីរពេទ្យគន្ធបុប្ផា បានបង្ហាញ និងជម្រាបជូនគណៈប្រតិភូជាន់ខ្ពស់នៃប្រទេសលុចសំបួ នូវផ្នែកនីមួយៗនៃមន្ទីរពេទ្យរួមមាន បន្ទប់សង្រ្គោះបន្ទាន់កុមារ និងទារក, បន្ទប់សង្រ្គោះក្រោយវះកាត់បេះដូង, មន្ទីរពិសោធន៍ និងផ្នែកថតឆ្លុះរូបភាពវេជ្ជសាស្ត្រ។
ព្រះអង្គម្ចាស់ និងគណៈប្រតិភូបានស្វែងយល់ពីការរីកចម្រើនក្នុងវិស័យសុខាភិបាល ជាពិសេសវឌ្ឍនភាពការងាររបស់មន្ទីរពេទ្យគន្ធបុប្ផា ដែលបានព្យាបាលកុមារកម្ពុជាដោយឥតគិតថ្លៃប្រកបដោយគុណភាព។ គណៈប្រតិភូជាន់ខ្ពស់នៃប្រទេសលុចសំបួបានចងចាំនូវទស្សនកិច្ចនាថ្ងៃនេះ និងពិចារណាលើលទ្ធភាពជំនួយសប្បុរសធម៌ណាមួយជូនដល់មន្ទីរពេទ្យ នាថ្ងៃអនាគត។
សូមជម្រាបថា ក្នុងឆ្នាំ២០២៤កន្លងទៅ, មន្ទីរពេទ្យគន្ធបុប្ផាបានពិនិត្យ និងព្យាបាលទារក និងកុមារចំនួនប្រមាណ ១,២ លានករណី ព្រមទាំងស្រ្តីមានផ្ទៃពោះចំនួន ១០៥ ៣៩៦ ករណី ដោយឥតគិតថ្លៃ ប្រកបដោយគុណភាព និងមិនមានការរើសអើង។ ក្នុងមួយឆ្នាំៗមន្ទីរពេទ្យគន្ធបុប្ផា ត្រូវការចំណាយជាមធ្យមប្រមាណជាង ៤០លានដុល្លារអាមេរិក ក្នុងបេសកកម្មសង្គ្រោះជីវិតទារក កុមារ និងស្រ្តីមានផ្ទៃពោះរាប់លាននាក់នៅកម្ពុជា៕
