ព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ បានកោតសរសើរចំពោះសមិទ្ធផលទាំងឡាយរបស់កម្ពុជា និងសព្វព្រះរាជហឫទ័យចំពោះភាពសម្បូរបែបនៃបេតិកភណ្ឌវប្បធម៌ខ្មែរ។ នេះបើតាមការឲ្យដឹងក្នុងសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ ពីលទ្ធផលនៃព្រះរាជទស្សនកិច្ចជាន់ខ្ពស់របស់ព្រះអង្គម្ចាស់រជ្ជទាយាទ នៃប្រទេសលុចសំបួ នៅព្រះរាជាណាចក្រកម្ពុជា ពីថ្ងៃទី២៩ ខែមីនា ដល់ថ្ងៃទី២ ខែមេសា ឆ្នាំ២០២៥។
ក្នុងឱកាសនៃព្រះរាជទស្សនកិច្ចនេះ ព្រះអង្គម្ចាស់រជ្ជទាយាទអមព្រះរាជ ដំណើរដោយ ឯកឧត្តម Xavier Bettel ឧបនាយករដ្ឋមន្ត្រី និងជារដ្ឋមន្ត្រីការបរទេស ពាណិជ្ជកម្មបរទេស កិច្ចសហប្រតិបត្តិការអភិវឌ្ឍន៍ និងកិច្ចការមនុស្សធម៌ បានជួបពិភាក្សាទ្វេភាគីជាមួយ ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិន ព្រះរាជាណាចក្រកម្ពុជា នៅថ្ងៃទី៣១ ខែមីនា ឆ្នាំ២០២៥ នៅទីស្តីការក្រសួងការបរទេស និង សហប្រតិបត្តិការអន្តរជាតិ។
ព្រះអង្គម្ចាស់រជ្ជទាយាទ បានកោតសរសើរចំពោះសមិទ្ធផលទាំងឡាយរបស់កម្ពុជា លើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍ និងបានសព្វព្រះរាជហឫទ័យយ៉ាងខ្លាំងចំពោះភាពសម្បូរបែប នៃបេតិកភណ្ឌវប្បធម៌ខ្មែរ បន្ទាប់ពីព្រះអង្គ បានយាងទតប្រាសាទអង្គវត្ត និងតំបន់ប្រវត្តិសាស្ត្រផ្សេងទៀតក្នុងខេត្តសៀមរាប។
ឯកឧត្ដមឧបនាយករដ្ឋមន្ត្រី Xavier Bettel រដ្ឋមន្ត្រីការបរទេសលុចសំបួ បានបញ្ជាក់អំពីការប្តេជ្ញាចិត្តក្នុងការពង្រឹង និងពង្រីកទំនាក់ទំនងទ្វេភាគីជាមួយកម្ពុជាបន្ថែមទៀត។ ភាគីទាំង ពីរបានពិភាក្សាអំពីកាលានុវត្តភាពក្នុងការជំរុញចក្ខុវិស័យរួម ដើម្បីពង្រឹងកិច្ចសហប្រតិបត្តិការទ្វេភាគី ជាពិសេសនៅក្នុងវិស័យសំខាន់ៗ ដូចជា សុខាភិបាល អប់រំ ការបោសសម្អាតមីន និងទេសចរណ៍។ ភាគី ទាំងពីរបានគូសបញ្ជាក់ថា ព្រះរាជទស្សនកិច្ចជាន់ខ្ពស់នេះ បានតំណាងឱ្យទំនាក់ទំនងដ៏ជិតស្និទ្ធនិង បានត្រួសត្រាយផ្លូវសម្រាប់ការពង្រឹង និងពង្រីកកិច្ចសហប្រតិបត្តិការ ដើម្បីប្រយោជន៍ទៅវិញទៅមក នៃប្រជាជាតិទាំងពីរ។
ឯកឧត្ដមឧបនាយករដ្ឋមន្ត្រី បានស្វាគមន៍ចំពោះបំណងរបស់ប្រទេសលុចសំបួក្នុងការបង្កើត ការិយាល័យតំណាងរបស់ខ្លួននៅរាជធានីភ្នំពេញផងដែរ៕
