រាជធានីភ្នំពេញ នឹងដាក់ឲ្យដំណើរការសាកល្បងផ្លូវថ្មើរជើង (Walk Street) តាមបណ្ដោយតិរវិថីព្រះស៊ីសុវិត្ថ ចាប់ពីមុខប្រៃសណីយ៍កម្ពុជា រហូតដល់មុខព្រះបរមរាជវាំង ស្ថិតនៅខណ្ឌដូនពេញ រាជធានីភ្នំពេញ នៅថ្ងៃទី០១ ខែកុម្ភៈ ឆ្នាំ២០២៥ ខាងមុខនេះ។ ផ្លូវថ្មើរជើងនេះ នឹងដំណើរការមួយសប្ដាហ៍២ថ្ងៃ ថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាច ដល់ម៉ោង១១យប់។
ក្នុងកិច្ចប្រជុំត្រួតពិនិត្យការបើកដំណើរសាកល្បងនៃគម្រោងផ្លូវថ្មើរជើង ( Walk Street ) តាមបណ្ដោយតិរវិថីព្រះស៊ីសុវិត្ថ ( ចាប់ពីមុខប្រៃសណីយ៍កម្ពុជា ពីផ្លូវលេខ៩៤ ដល់ផ្លូវលេខ២៤០ ) នៅសាលារាជធានីភ្នំពេញ កាលពីរសៀលថ្ងៃទី ២៩ ខែមករា ឆ្នាំ២០២៥ ឯកឧត្ដម ឃួង ស្រេង អភិបាលរាជធានីភ្នំពេញ បានបញ្ជាក់ថា ផ្លូវថ្មើជើងនេះ គឺអាជ្ញាធរបានគ្រោងអនុវត្តន៍តំាងពីឆ្នាំ២០១៩មកម្លេះ ប៉ុន្តែដោយសារជំងឺកូវីដ១៩ ធ្វើឲ្យគម្រោងមួយនេះ មិនអាចលេចចេញជារូបរាងឡើង។ មកដល់ពេលនេះ បន្ទាប់ពីមានការណែនាំរបស់រាជរដ្ឋាភិបាល អាជ្ញាធររាជធានីភ្នំពេញ បានគិតគូជំរុញការងារផ្លូវថ្មើរជើងនេះឲ្យដំណើរការឡើងវិញ ដើម្បីធ្វើយ៉ាងទាក់ទាញភ្ញៀវទេសចរជាតិ និងអន្តរជាតិ ។
ឯកឧត្ដម ឃួង ស្រេង បានបន្តថា ជាជំហានដំបូង នឹងប្រកាសបិទចរាចរណ៍យានជំនិះគ្រប់ប្រភេទ រៀបជាចំណត បង្គន់អនាម័យ និងការងាររៀបចំសណ្តាប់ធ្នាប់ការលក់ដូរនៅលើតម្រាយផ្លូវនេះឱ្យ បានល្អដែលធានាថា គម្រោងនេះនឹងប្រព្រឹត្តិទៅដោយរលូន ហើយទទួលបានការគាំទ្រពីប្រជាពលរដ្ឋ។
ជាមួយគ្នានេះ ឯកឧត្តម បានសង្កត់ធ្ងន់ថា ក្រោយពីបើកដំណើរការសាកល្បង អាជ្ញាធររាជធានីភ្នំពេញ នឹងធ្វើការអង្កេត និងដកបទពិសោធន៍ ដើម្បីកែលម្អផ្លូវថ្មើជើង(Walk street) នេះឲ្យកាន់តែល្អប្រសើរថែមទៀត៕
អត្ថបទ៖ ពុទ្ធិកា
