សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តព្រៃវែង បានអញ្ជើញជាអធិបតីដឹកនាំកិច្ចប្រជុំបូកសរុបសកម្មភាពការងារគណៈកម្មាធិការគណបក្សខេត្តព្រៃវែង ឆ្នាំ២០២៤ និងលើកទិសដៅអនុវត្តបន្តឆ្នាំ២០២៥ នាព្រឹកថ្ងៃទី១៩ ខែមករា ឆ្នាំ២០២៥នេះ ស្ថិតនៅភូមិ២ សង្កាត់កំពង់លាវ ក្រុងព្រៃវែង។
សម្តេចក្រឡាហោម មានប្រសាសន៍ថា ឆ្នាំ២០២៥ នេះជាពេលវេលាដ៏សមស្របសម្រាប់គណបក្សយើងបន្តពង្រឹង សកម្មភាពការងារគណបក្សឱ្យបានសកម្មព្រមៗគ្នាគ្រប់មូលដ្ឋាន ពិសេសការបន្ត ពង្រឹងអង្គការចាត់តាំងបក្សនៅមូលដ្ឋាន ការជំរុញសកម្មភាពចលនាអង្គការមហាជន របស់គណបក្សដើម្បីពង្រឹង ពង្រីកសមាជិកបក្សពីក្នុងចំណោមយុវជនដែលដល់អាយុ ត្រូវបោះឆ្នោត និងការពង្រឹងការគ្រប់គ្រងអប់រំថែបំប៉នសមាជិកបក្សឱ្យបានល្អ ព្រមជាមួយការជំរុញសកម្មភាពការងារគណបក្សគ្រប់ផ្នែក ដើម្បីឈានឆ្ពោះទៅដណ្តើមជោគជ័យជូនគណបក្សឱ្យបានដាច់ខាតក្នុងការបោះឆ្នោតនៅឃុំ សង្កាត់ នាឆ្នាំ២០២៧ និងការបោះឆ្នោតជាតិ នាឆ្នាំ២០២៨ ខាងមុខ។
សម្ដេចក្រឡាហោម បានផ្តល់អនុសាសន៍ដល់ថ្នាក់ដឹកនាំនិងសមាជិកក្រុមការងារទាំង អស់មិនត្រូវមានទស្សនៈឆ្អែតឆ្អន់នឹងសន្តិភាព ស្ថិរភាព សន្តិសុខ សណ្តាប់ធ្នាប់សាធារណៈ និងការអភិវឌ្ឍ ជាដាច់ខាត ពីព្រោះកត្តាទាំងនេះជាមូលដ្ឋានគ្រឹះនៃជីវភាពរស់នៅដ៏សុខសាន្តរបស់ប្រជាជន ដែលក៏ជា ស្នូលនៃការពង្រឹងកម្លាំងនយោបាយរបស់គណបក្ស។ សម្ដេចក្រឡាហោម ក៏បានណែនាំឱ្យបន្តចុះ តាមមូលដ្ឋាន ចុះតាមខ្នងផ្ទះ ចុះតាមដីស្រែ ដីចម្ការ និងកន្លែងប្រកបរបរទទួលទានរបស់ប្រជាជន ដើម្បីស្វែងយល់ពីជីវភាពរស់នៅ សុខទុក្ខ តម្រូវការ សំណើ សំណូមពរ និងដោះស្រាយបញ្ហារបស់ប្រជាជន ប្រកបដោយយុត្តិធម៌ បន្តតាមដានព័ត៌មាន និងសាធារណមតិ ដើម្បីប្រមូលបញ្ហាពាក់ព័ន្ធមកដោះស្រាយ ហើយទន្ទឹមគ្នានេះត្រូវរួមគ្នាប្រឆាំងព័ត៌មានក្លែងក្លាយ ដែលជាអាវុធបំពុលសង្គមប្រភេទថ្មីដ៏ពេញនិយម ជាពិសេសលើបណ្តាញផ្សព្វផ្សាយសង្គម។
សម្ដេចក្រឡាហោម បានណែនាំថ្នាក់ដឹកនាំ និងក្រុមការងារគណបក្ស បំផុសឱ្យប្រជាពលរដ្ឋ ចូលរួមអប់រំ តាមដាន ទូន្មាន ប្រៀនប្រដៅកូនចៅរបស់ខ្លួនឱ្យ ចៀសឆ្ងាយពីអំពើអបាយមុខក្នុងសង្គម ដូចជាគ្រឿងញៀន ល្បែងស៊ីសង និងក្មេងទំនើងជាដើម ជាពិសេសជំរុញឱ្យអាជ្ញាធរគ្រប់ថ្នាក់ ដឹកនាំអនុវត្តឱ្យបានសកម្ម និងប្រកបដោយប្រសិទ្ធភាពនូវគោលនយោបាយភូមិ-ឃុំ-សង្កាត់មានសុវត្ថិភាព។
សម្ដេចក្រឡាហោម ក៏បានណែនាំដល់ ថ្នាក់ដឹកនាំ និងគ្រប់តួអង្គក្នុងយន្តការគណៈកម្មាធិការគណបក្សខេត្តព្រៃវែង រួមគ្នាប្តេជ្ញាចិត្តគាំទ្រឱ្យបាន ខ្លាំងក្លាលើការដឹកនាំរបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីសម្រេចបានជោគជ័យ យុទ្ធសាស្ត្របញ្ចកោណ និងគោលដៅកម្ពុជាឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងជាប្រទេសមានចំណូលខ្ពស់ នៅឆ្នាំ២០៥០។ជារួម អង្គប្រជុំបានប្ដេជ្ញាចិត្តខ្ពស់ កសាងកម្លាំងនយោបាយ តាមរយៈការធ្វើអំពើល្អជាមួយប្រជាជន ដើម្បីបន្តដណ្ដើមយកប្រៀបឈ្នះជូនគណបក្ស គ្រប់ៗអាណត្តិនៃការបោះឆ្នោត ស្របតាមច្បាប់ និងគោលការណ៍លទ្ធិប្រជាធិបតេយ្យ សេរីពហុបក្ស ក្រោមអគ្គមគ្គុទេសក៍ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា៕
