ឈ្មោះលី រតនរស្មី ត្រូវបានសម្តេចតេជោ ហ៊ុន សែន ប្រធានគណបក្សប្រជាជនកម្ពុជាបញ្ចប់តួនាទីជាទីប្រឹក្សាតាំងពីថ្ងៃទី ១៣ ខែមីនា ឆ្នាំ២០២៤ ដោយបានប្រព្រឹត្តកំហុសឆ្គង ដែលផ្ទុយនឹងកម្មវិធីនយោបាយនិងលក្ខន្តិកៈរបស់គណបក្ស។ នេះបើតាមសេចក្ដីសម្រេចស្ដីពីការបញ្ចប់ភារកិច្ចមន្ត្រីគណបក្ស ដែលត្រូវបានបានចែកចាយក្នុងបណ្ដាញសង្គម នៅថ្ងៃទី១៧ ខែមករា ឆ្នាំ២០២៥នេះ។
ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានបង្ហោះសេចក្តីសម្រេចនេះលើហ្វេសប៊ុក និងឲ្យបញ្ឈប់ការចងភ្ជាប់ឈ្មោះនេះជាមួយសម្តេចតេជោ និងគណបក្សប្រជាជនកម្ពុជា ឬជាមួយរាជរដ្ឋាភិបាលតទៅទៀត។
ចំណែកឯកឧត្តម សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងថា ក្រោយពីតាមដានស្រាវជ្រាវឯកសារពីទីស្នាក់ការគណបក្សប្រជាជនកម្ពុជា ទើបដឹងថាបុគ្គល លី រតនរស្មី ត្រូវបានដកតំណែងពីទីប្រឹក្សាសម្តេចតេជោ ហ៊ុន សែន ប្រធានគណៈបក្សប្រជាជនកម្ពុជា តាំងពីថ្ងៃទី១៣ ខែមិនា ឆ្នាំ២០២៤ មកម្លេះ។ គួរបញ្ជាក់ថាឈ្មោះ លី រតនរស្មី ទទួលបានតែងតាំងនាថ្ងៃទី២៣ ខែមករា ឆ្នាំ២០២៤។
ដូច្នេះឈ្មោះ លី រតនរស្មី នេះធ្លាប់ទទួលបានតំណែងទីប្រឹក្សាសម្តេចតេជោបានតែជាង១ខែប៉ុណ្ណោះក៏ត្រូវដកចេញវិញ ដោយសារគណបក្សនៅមូលដ្ឋានបានឃើញទង្វើមិនប្រក្រតី មិនគោរពវិន័យ ធ្វើអ្វីតាមទំនើងចិត្តមិនសួរយោបល់ថ្នាក់លើរបស់ឈ្មោះ លី រតនរស្មី នេះក៏បានស្នើសម្តេចតេជោចេញសេចក្តីសម្រេចដកគាត់ចេញពីតំណែងទីប្រឹក្សាវិញ។
បើតាមឯកឧត្តម សូ ណារ៉ូ ឯកសារដកតំណែងនេះមានតាំងពីយូរមកហើយ គ្មានអ្នកណាចាប់អារម្មណ៍ឡើយ រហូតដល់ពេលនេះពេលឈ្មោះ រតនរស្មី ជាប់ជាជនសង្ស័យពាក់ព័ន្ធនឹងការធ្វើឃាតលោក លឹម គិមយ៉ា ទើបស្វែងរកឃើញលិខិតដកតំណែងនេះចុះហត្ថលេខាតាំងពីថ្ងៃទី១៣ ខែមិនា ឆ្នាំ២០២៤ មកម្លេះ។
យោងតាមកាសែតក្នុងស្រុកថៃ សមត្ថកិច្ចថៃបានស្នើឱ្យប៉ូលិសអាំងទែប៉ូលចេញនិវេទន៍ក្រហមតាមស្វែងរក និងចាប់ខ្លួនបុគ្គលឈ្មោះ លី រតនរស្មី ជនជាតិខ្មែរដែលសង្ស័យជាអ្នកបញ្ជាផ្ទាល់ឲ្យខ្មាន់កាំភ្លើងបាញ់សម្លាប់លោក លិម គិមយ៉ា អតីតតំណាងរាស្ត្រនៃអតីតគណបក្សសង្គ្រោះជាតិនៅក្នុងប្រទេសថៃកាលពីថ្ងៃទី ៧ មករា។ បុគ្គល លី រតនរស្មី ធ្លាប់ជាអតីតសកម្មជនបក្សប្រឆាំងប្រចាំនៅប្រទេសថៃ និងធ្លាប់បានចូលរួមនូវសកម្មភាពប្រឆាំងនានាគ្រាកន្លងផងដែរ៕
អត្ថបទ៖ អក្ខរា
