អ្នកនាំពាក្យអះអាងថា លោកឧត្តមសេនីយ៍ទោ ប៊ុន ភក្តី ជាជនជាតិខ្មែរកើតនៅខេត្តតាកែវ មិនដូចការចោទប្រកាន់ថា ជាជនជាតិវៀតណាមឡើយ

អ្នកនាំពាក្យបណ្ឌិត្យសភានគរបាលកម្ពុជា នៅថ្ងៃទី០៧ ខែមករា ឆ្នាំ២០២៥នេះ ចេញសេចក្តីបំភ្លឺ ចំពោះព័ត៌មានដែលបានចុះផ្សាយលើបណ្តាញសង្គមហ្វេសប៊ុក និងសារព័ត៌មានមួយចំនួនដែលធ្វើឱ្យមានការភាន់ច្រឡំ និងមានការរើសអើងចំពោះ លោកឧត្តមសេនីយ៍ទោ ប៊ុន ភក្តី នាយកវិទ្យាស្ថានបណ្តុះបណ្តាល វិជ្ជាជីវៈនគរបាលនៃបណ្ឌិត្យសភានគរបាលកម្ពុជា ដោយចោទប្រកាន់ថាជាជនជាតិវៀតណាម។

នាពេលថ្មីៗនេះ បណ្តាញផ្សព្វផ្សាយមួយចំនួនបានចុះផ្សាយថា បុរសជនជាតិវៀតណាមម្នាក់ ក្រោយទទួលបានសញ្ជាតិខ្មែរ និងប្ដូរឈ្មោះថ្មីថា ប៊ុន ភក្ដី កំពុងពាក់ផ្កាយ២ ក្នុងជួរនគរបាលជាតិកម្ពុជា។ តាមប្រភព កាលពីអំឡុងឆ្នាំ២០២៣ កន្លងទៅ លោក Nguyen Huu Thuan ជនជាតិវៀតណាម សញ្ជាតិវៀតណាម (បច្ចុប្បន្ន អាយុ៣២ឆ្នាំ) កើតនៅខេត្ត Quang Nam សាធារណរដ្ឋសង្គមនិយមវៀតណាម ទទួលបានការត្រាស់បង្គាប់ផ្ដល់សញ្ជាតិខ្មែរ ដោយសញ្ជាតូបនីយកម្ម និងប្ដូរឈ្មោះជា ប៊ុន ភក្ដី (Bun Pheakdey) តាំងពីនៅមានអាយុ៣០ឆ្នាំ ដោយព្រះរាជក្រឹត្យលេខ នស/រកត/០៤២៣/៦២១ ចុះថ្ងៃទី០៨ ខែមេសា ឆ្នាំ២០២៣ ។ ការទទួលបានសញ្ជាតិខ្មែរ និងប្ដូរឈ្មោះថ្មីរបស់លោក Nguyen Huu Thuan មកជា ប៊ុន ភក្ដី (Bun Pheakdey) ដូចគ្នាទៅនឹងឈ្មោះប៉ូលិសខ្មែរ ថ្នាក់ឧត្តមសេនីយ៍ ១រូប គឺលោកឧត្តមសេនីយ៍ទោ ប៊ុន ភក្ដី អត្តលេខ ៧០៨៥០ នាយនគរបាលថ្នាក់ឧត្តមសេនីយ៍ ក្របខ័ណ្ឌមន្ដ្រីនគរបាលជាតិកម្ពុជា នៃក្រសួងមហាផ្ទៃ ។

ករណីនេះ សាមីខ្លួនធ្លាប់បានបកស្រាយរួចហើយអំពីជីវប្រវត្តិរបស់ខ្លួន។ ក្នុងសេចក្តីបំភ្លឺ អ្នកនាំពាក្យបណ្ឌិត្យសភានគរបាលកម្ពុជា បញ្ជាក់ជាថ្មីថា លោកឧត្តមសេនីយ៍ទោ ប៊ុន ភក្តី នាយកវិទ្យាស្ថានបណ្តុះបណ្តាលវិជ្ជាជីវៈនគរបាលនៃបណ្ឌិត្យសភានគរបាលកម្ពុជា គឺជាជនជាតិខ្មែរ និងមានទីកន្លែងកំណើត នៅឃុំព្រះបាទជាន់ជុំ ស្រុកគិរីវង់ ខេត្តតាកែវ។

ជាមួយគ្នានេះ អ្នកនាំពាក្យបណ្ឌិត្យសភានគរបាលកម្ពុជា ក៏មានការសោកស្តាយចំពោះជនឆ្លៀតឱកាស ដើម្បីកេងចំណេញនយោបាយ បំភ្លៃការពិត នាំឱ្យមានការរើសអើង ហើយករណីនេះ សាម៉ីខ្លួន ក៏បានរៀបចំចាត់វិធានការតាមផ្លូវច្បាប់ចំពោះជនណាដែលបានមូលបង្កាច់ បង្ខូចកេរ្តិ៍ឈ្មោះនិងកិត្តិយស សេចក្តីថ្លៃថ្នូរ នាំឱ្យមានការយល់ច្រឡំ និងរើសអើងចំពោះខ្លួន និងបណ្ឌិត្យសភានគរបាលកម្ពុជា ឱ្យទទួលខុសត្រូវចំពោះមុខច្បាប់ជាធរមាន៕

អត្ថបទ៖ អក្ខរា