ធ្លាប់តែឡូយឆាយហ៊ឹហារជាមួយសម្ភារៈប្រ៊េនប្រ៊េន ពេលនេះកំពូលតារាចម្រៀង ខេមរៈ សិរីមន្ត ប្តូររសជាតិថ្មីមកធ្វើបុគ្គលិកអនាម័យ ជាមួយឈុតសម្លៀកបំពាក់អ្នកប្រមូលសំរាមវិញម្តង កាន់តែប្លែក កាន់តែអស្ចារ្យ មើលហើយសឹងតែមិនជឿថា ជាកំពូលតារាចម្រៀងល្បីឈ្មោះប្រចាំនៅក្នុងផលិតកម្ម Galaxy Navatra គឺលោក ខេមរៈ សិរីមន្ត ។
ដាច់ឆ្នាំថ្មីសល់អ្វីខ្លះ ? គឺជាបទចម្រៀងរបស់កំពូលតារាចម្រៀង ខេមរៈសិរីមន្ត ដែលបានចេញកាលពីបំណាច់ឆ្នាំ ២០២៣ ប៉ុន្តែបទចម្រៀងនេះនៅពុំទាន់បានថតនិងចេញជា MV នៅឡើយទេ ។ បទចម្រៀង « ដាច់ឆ្នាំថ្មីសល់អ្វីខ្លះ ? » និពន្ធ Melody និងទំនុកច្រៀងដោយ យ៉ង់ ចន្ទនីតា និងនិពន្ធបទភ្លេងដោយ ភ័ណ្ឌ ក្នុងបទចម្រៀងនេះដែរគឺចង់និយាយពីការខំប្រឹងទាំងថ្ងៃ ទាំងយប់ ព្រោះខ្លាចពាក្យថា ក្រ មិនថាហត់នឿយឬលំបាកយ៉ាងណាក៏មិនបោះបង់ខ្លួនឯង ស៊ូទៅមុខជានិច្ច ។
រំលងអស់ពេលជាច្រើនខែពេលនេះ បទចម្រៀង « ដាច់ឆ្នាំថ្មីសល់អ្វីខ្លះ ? » ត្រូវបានថតជា MV ហើយ ក្នុងផលិតកម្ម Galaxy Navatra ជាក់ស្តែងនៅប៉ុន្មានម៉ោងមុននេះ តារាចម្រៀង ខេមរៈ សិរីមន្ត បានបច្ចេញវិដេអូខ្លីរបស់ខ្លួនដែលកំពុងថតនៅក្នុង MV ចម្រៀងនេះ ។
ក្នុងវិដេអូនលោក ខេមរៈ សិរីមន្ត បានសម្តែងជាតួបុគ្គលិកអនាម័យ ក្នុងឈុតសម្លៀកបំពាក់ជាអ្នកប្រមូលសំរាម ថ្វីដ្បិតតែមិនធ្លាប់បានឆ្លងកាត់នូវករសម្តែងបែបនេះពីមុនមក ប៉ុន្តែក្នុង MV ចម្រៀងនេះ លោក ខេមរៈ សិរីមន្ត ពិតជាសម្តែងបានល្អណាស់ តាមរយៈវិដេអូខ្លីនេះ មានអ្នកគាំទ្រជាច្រើន បានសរសើរនូវសមត្ថភាព និងការដាក់ខ្លួនរបស់លោក ។
កំពូលតារាចម្រៀងលោក ខេមរៈ សិរីមន្ត បានឆ្លើយតបទៅអ្នកគាំទ្រភ្លាមៗថា « អរគុណបងប្អូនពូមីង ទាំងអស់គ្នា ដែលតែងតែគាំទ្រខ្ញុំបាទ តាំងពីដើមរហូតមក ខ្ញុំនឹងខិតខំស្វែងរកអ្វីថ្មីៗ ដើម្បីជូនដល់ពូមីងបងប្អូនកម្សាន្តអារម្មណ៍បន្តទៀត ដោយក្តីស្រឡាញ់ និងគោរពបំផុត » ។
បើតាមគម្រោង MV ចម្រៀង « ដាច់ឆ្នាំថ្មីសល់អ្វីខ្លះ ? » របស់កំពូលតារាចម្រៀង ខេមរៈ សិរីមន្ត នឹងចេញជាផ្លូវការក្នុងពេលឆាប់ៗខាងមុខនេះហើយជាមួយនិងរសជាតិថ្មី ប្លែក មិនធ្លាប់មានពីមុនមកនៅក្នុងផលិតកម្ម Galaxy Navatra ។ ដូចមហាជនដឹងស្រាប់ហើយថា ផលិតកម្ម Galaxy Navatra គឺជាផលិតកម្មខ្នាតយក្សឈានមុខគេដែលតែងតែនាំអ្វីដែលថ្មីប្លែកមកចែករំលែកជូនបងប្អូនទស្សនា ដូច្នេះកុំភ្លេចចូលរួមគាំទ្រស្នាដៃរបស់ Idol ឱ្យបានច្រើន ធានាថា ប្លែក និងគួរឱ្យចាប់អារម្មណ៍បំផុត ៕
