មានមិត្តសិល្បៈតិចតួចណាស់ដែលបានដឹងថា តារាសម្តែង សួង ស៊ីធឿន មានផ្ទៃពោះ ថែមទាំងសម្រាលបានកូនស្រីដ៏គួរឱ្យស្រឡាញ់ម្នាក់កាលពីពេលថ្មីៗនេះជាមួយគូដណ្តឹងរបស់ខ្លួន ។
ថ្វីដ្បិតតែពុំទាន់មានពិធីមង្គលការធំដុំប៉ុន្តែតារាសម្តែង សួង ស៊ីធឿន ធ្លាប់បានរៀបចំពិធីភ្ជាប់ពាក្យរួច មកហើយកាលពីឆ្នាំ២០២២ ជាមួយតារារូបសង្ហា អ៊ូ សំខាន់ ក្រោយមកទៀតនាងក៏បានស្ងាត់ឈឹងពីឆាកសម្តែង យូរៗម្តងទើបឃើញវត្តមានរបស់នាង ។
ស្របពេលដែលបាត់មុខពីឆាកសម្តែងនេះ សួង ស៊ីធឿន បានសំងំថែទាំងសុខភាពដើម្បីត្រៀមសម្រាលកូន ហើយក៏គ្មានមិត្តសិល្បករណាម្នាក់បានដឹងថា នាងមានផ្ទៃពោះដែរ ភាគច្រើនមានតែមិត្តស្និទ្ធស្នាលប៉ុន្មាននាក់ប៉ុណ្ណោះដឹងរឿងនេះ ពីព្រោះនាងបានផ្តាច់ខ្លួនឆ្ងាយពីសិល្បៈ និងមិត្តភក្តិ ។
សួង ស៊ីធឿន សម្រាលបានកូនស្រីម្នាក់កាលពីថ្ងៃទី ១១ ខែ វិច្ឆិកា ឆ្នាំ ២០២៤ កន្លងមកនេះ ទាំងនាងនិងកូនស្រី មានសុខភាពល្អធម្មតា ប៉ុន្តែអ្វីដែលជា អាថ៌កំបាំងនោះ គឺ សួង ស៊ីធឿន បង្ហោះតែរូបកូនតូចរបស់ខ្លួនប៉ុណ្ណោះ ចំពោះរូបភាពនាងវិញ គឺពុំដែលបង្ហាញឡើយ ។ ចំពោះដៃគូរបស់នាងវិញ រំភើបនិងរីករាយជាមួយនិងសមាជិកថ្មីខ្លាំងណាស់ ។
មិនដឹងថា តើពេលណា សួង ស៊ីធឿន បង្ហាញនូវការពិតនេះឱ្យមហាជនបានដឹងលឺនោះទេ ។ មិត្តសិល្បៈជាច្រើនបានផ្ញើសារជូនពរនាងគ្រប់ៗគ្នានៅពេលដែលដឹងថា នាងសម្រាលបានកូនស្រីដ៏គួរឱ្យស្រឡាញ់ម្នាក់ ។
សួង ស៊ីធឿន ធ្លាប់ជាតារាសម្តែងស្រីដ៏លេចធ្លោមួយរូប ប៉ុន្តែនៅពេលដែលកេរ្តិ័ឈ្មោះល្បីល្បាញនាងបែរជាបោះបង់ឱកាសល្អនោះចោលទៅវិញ ដើម្បីសាងជីវិតគ្រួសារ និងបង្កើតមុខរបររកស៊ីជាច្រើន រកប្រាក់ចំណូលចិញ្ចឹមជីវិត ៕
