អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឱ្យដឹងថា គណបក្សប្រជាជនកម្ពុជា បានរៀបចំឯកសាររួចរាល់ហើយសម្រាប់ការចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ២០២៣ ខាងមុខ។
សម្រាប់មណ្ឌលខេត្តតាកែវមាន ៨ អាសនៈ គឺគណបក្សប្រជាជនកម្ពុជា បានតែងតាំង និងប្រកាសបេក្ខជនជាផ្លូវការហើយ ដោយមានបេក្ខជនឈរឈ្មោះសរុបចំនួន ១៦ រូប (បេក្ខជនពេញសិទ្ធិ៨រូប និងបេក្ខជនបម្រុង៨រូប)។
លោក ប៊ិន ឈិន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ជាបេក្ខជនពេញសិទ្ធិលេខរៀងលើគេ ខណៈរដ្ឋមន្ត្រីក្រសួងប្រៃសណីយ៍ លោក ជា វ៉ាន់ដេត ឈរជាបេក្ខជនលេខរៀងទី២ ក្នុងបញ្ជីឈ្មោះបេក្ខជននៃគណបក្សប្រជាជនកម្ពុជាមណ្ឌលខេត្តតាកែវ។
ដោយឡែក សមាជិករដ្ឋសភា និងជាតំណាងរាស្ត្រក្នុងតំណែងបច្ចុប្បន្នចំនួន៦រូប ដូចជា៖ លោកស្រី និន សាផុន លោក ម៉ុក ម៉ារ៉េត លោក ស៊ូ ភិរិន្ទ លោក ច័ន្ទ សារុន លោក អ៊ិត សុខ និងលោកស្រី នូ សុវណ្ណនី នឹងត្រូវបន្តឈរឈ្មោះជាបេក្ខជនពេញសិទ្ធិក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ មណ្ឌលខេត្តតាកែវ ជាបន្តទៀត។
បន្ថែមទៀតនោះ លោក លី ស៊ុគ្រី សមាជិករដ្ឋសភា លោក ឈិត សុខុន រដ្ឋមន្ត្រីក្រសួងធម្មការ និងសាសនា លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោក សុខ សូកាន រដ្ឋលេខាធិការក្រសួងរៀបចំដែនដី លោក ពេជ សោភ័ន រដ្ឋលេខាធិការក្រសួងការងារ លោក សុខ ផេង រដ្ឋលេខាធិការក្រសួងសុខាភិបាល លោកស្រី គា សុភូ អភិបាលរងខេត្តតាកែវ និងលោក សុខុម ភគវន្តមុនី រដ្ឋលេខាធិការក្រសួងសាធារណការ គឺត្រូវបានគណបក្សប្រជាជនកម្ពុជាសម្រេចតែងតាំងជាបេក្ខជនឈរឈ្មោះបម្រុងសម្រាប់ការបោះឆ្នោតនេះផងដែរ៕
