កញ្ញា ម៉ាច ដាវី កាន់តែហិរខ្លាំងក្នុងរយៈពេលប៉ុន្មានខែចុងក្រោយនេះ ដោយនាងហ៊ានថតឈុតសិចស៊ី បង្ហាញរូបរាងមិនសំចៃខ្លួនដូចកាលពីមុនឡើយ សូម្បីតែរូបនាងផ្ទាល់ក៏បានទទួលស្គាល់ផងដែរថា ពេលថតរូបសិចស៊ីធ្វើឱ្យនាងមានអារម្មណ៍ស្រស់ស្រាយ ។
មួយរយៈពេលចុងក្រោយនេះពុំឃើញកញ្ញា ម៉ាច ដាវី ចេញថតកុនដូចមុនទេ ភាគច្រើននាងមមាញឹកតែក្នុងការថតម៉ូដ និងថតផ្សាយពណិជ្ជកម្មប៉ុណ្ណោះ ។ ថ្វីដ្បិតតែបាត់មុខមិនចេញថតភាពយន្តដូចមុន កញ្ញា ម៉ាច ដាវី តែងតែបង្ហោះរូបភាពស្អាតជាច្រើននៅឱ្យអ្នកគាំទ្រខ្លួនបានឃើញ ដើម្បីបង្ហាញពីសុខទុក្ខក៏ដូចជាការងាររបស់ខ្លួន ជាក់ស្តែងថ្មីៗនេះ នាងបានផ្លាស់ប្តូរខ្លួនឯងស្ទើរតែមួយរយដឺក្រេ ជាមួយនិងការថតរូបបែបសិចស៊ី ទាក់ទាញចំណាប់អារម្មណ៍មហាជនខ្លាំង ។
កញ្ញា ម៉ាច ដាវី បាននិយាយថា សម្រាប់នាង សិចស៊ីគឺជាស្រ្តីដែលមានទំនុកចិត្តចំពោះខ្លួនឯង ហើយនាងក៏ស្រឡាញ់ពេញចិត្តខ្លាំងនៅពេលដែលថតឈុតសិចស៊ី ដោយមិនខ្លាចនូវការរិះគន់ឡើយ ពីព្រោះសកម្មភាពទាំងនោះគ្រាន់តែជាសិល្បៈនៃការសម្តែងតែប៉ុណ្ណោះ សំខាន់យើងឱ្យតម្លៃខ្លួនឯង ។
កញ្ញា ម៉ាច ដាវី កាន់តែល្បីឈ្មោះ បន្ទាប់ពីលេចមុខនៅក្នុងរឿងភាគនិងរឿងដុំជាច្រើន ជាពិសេសពេលចូលរួមប្រកួតក្នុងកម្មវិធីបវរកញ្ញាមួយកាលពីពេលថ្មីៗមក កាន់តែធ្វើឱ្យកេរ្តិ៍ឈ្មោះ និងតម្លៃខ្លួននាងកើនឡើងទ្វេរដង ដើម្បីអភិវឌ្ឍន៍ខ្លួនឱ្យកាន់តែលេចធ្លោក្នុងសិល្បៈ នាងហ៊ានទទួលថតការងារគ្រប់បែបយ៉ាង មិនថាការងារសម្តែង ថតម៉ូដ ឬថតផ្សាយពាណិជ្ជកម្ម ។
កញ្ញា ម៉ាច ដាវី ធ្លាប់បានប្រាប់ថា មិនថាការងារអ្វីនាងទទួលធ្វើទាំងអស់ ឱ្យតែត្រូវតម្លៃ និងមិនហួសពីប្រពៃណីខ្មែរ ៕
