អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានដឹកនាំក្រុមការងារសមាគម ចូលថ្វាយកម្រងផ្កា និងគោរពព្រះវិញ្ញាណក្ខន្ធ ព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ” នៅមណ្ឌបតម្កល់ព្រះបរមរូប ក្នុងឱកាសគម្រប់ខួប១២ឆ្នាំ ដែលព្រះអង្គទ្រង់យាងសោយព្រះទិវង្គត នាព្រឹកថ្ងៃទី១៥ ខែតុលា ឆ្នាំ២០២៤។
ក្នុងឱកាសនោះ លោក អ៊ូ ប៊ុណ្ណារ៉ាត់ ហៅនាយក្រឹម តារាកំប្លែងដែលមានប្រជាប្រិយភាពក្នុងប្រទេសកម្ពុជា បានសម្តែងការនឹករលឹកដល់ព្រះអង្គ និងបានរម្លឹកពីស្នាព្រះហត្ថរបស់ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ដែលបានរំដោះប្រទេសចេញពីរបបអាណានិគមនិយមបារាំង និងទទួលបានឯករាជ្យនៅឆ្នាំ១៩៥៣។
ជាមួយគ្នានេះ ក្រៅពីបានរម្លឹកដល់ស្នាព្រះហស្ថរបស់ព្រះបរមរតនកោដ្ឋ លោក ជួង ជី ហៅនាយកុយវិញ ក៏បានលើកឡើងដែរថា សម្រាប់លោកផ្ទាល់ជាលើកទី១ហើយ ដែលបានមកគោរពវិញ្ញាណក្ខន្ធព្រះបរមរតនកោដ្ឋ ផ្ទាល់នៅមណ្ឌបតម្កល់ព្រះបរមរូប តាមរយៈសមាគមសិល្បករខ្មែរ ក្រោមការដឹកនាំរបស់អ្នកឧកញ៉ា ម៉ៅ ចំណាន ។
គួរបញ្ជាក់ថា ព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ព្រះអង្គប្រសូតនៅថ្ងៃអង្គារ ១១កើត ខែកត្តិក ឆ្នាំច ចត្វាស័ក ព.ស. ២៤៦៥ ត្រូវនឹងថ្ងៃទី៣១ ខែតុលា ឆ្នាំ១៩២២។
ព្រះអង្គបានយាងចូលព្រះទិវង្គត កាលពីថ្ងៃចន្ទ ១៥រោច ខែភទ្របទ ឆ្នាំរោង ចត្វាស័ក ព.ស. ២៥៥៦ ត្រូវនឹងថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា នាទីក្រុងប៉េកាំង សាធារណរដ្ឋប្រជាមានិតចិន៕
អត្ថបទ៖ ពុទ្ធិកា
