ក្នុងនាមជាពលរដ្ឋខ្មែរម្នាក់ដែលចូលចិត្តតាមដាននយោបាយស្រុកទេស តាមដានស្ថានភាពនយោបាយក្នុងតំបន់ និងពិភពលោក ខ្ញុំបានតាមដាននូវកិច្ចសម្ភាសរបស់លោក គឹម សុខ ជាមួយបណ្តាញសារព័ត៌មានខុសច្បាប់ និងការសរសេររបស់លោកលើហ្វេសប៊ុក ឃើញថា លោកហាក់ដូចជាមនុស្សមិនគ្រប់ទឹក ចេះតែចាក់រុក ញុះញង់ប្រជាពលរដ្ឋខ្លួនឯង មិនឱ្យរស់នៅបានសុខសោះ។ ឈ្មោះរបស់លោក គឺ«សុខ» មានន័យល្អណាស់ ប៉ុន្ត ចិត្តគំនិតរបស់លោកវិញ គឺមិនសមនឹងឈ្មោះនេះឡើយ ពោល គឺលោកមានចិត្តគំនិតអាក្រក់ជូរជាតិចំពោះជាតិ និងប្រជាពលរដ្ឋកម្ពុជា។
ហេតុអ្វីបានជាខ្ញុំហ៊ានអះអាងបែបនេះ? ប្រជាពលរដ្ឋដែលស្រឡាញ់ប្រទេសជាតិ ស្រលាញ់សន្តិភាព និងប្រាថ្នារស់នៅក្នុងសុខសន្តិភាព សូមតាមដានស្តាប់ ទស្សនា និងអានសំណេរវិភាគរបស់លោក គឹម សុខ ចុះថា តើដូចការលើកឡើងរបស់ខ្ញុំដែរ ឬអត់។ ខ្លួនឯងអត់គ្រប់ទឹកទេ តែមកវិភាគអប់រំគេ ខ្លួនឯងអត់ចេះច្បាប់ទេ តែមកចង់ណែនាំគេអំពីបញ្ហាច្បាប់ ខ្លួនឯងប្រព្រឹត្តបទល្មើស មានទោសជាប់ខ្លួនសោះ តែមកចង់ចាក់រុកឱ្យពលរដ្ឋស្លូតត្រង់នាំគ្នាទាមទាររកយុត្តិធម៌។
ដូចយ៉ាងកាលពីពេលថ្មីៗនេះ តាមរយៈហ្វេសប៊ុករបស់ខ្លួន លោក គឹម សុខ បានញុះញង់ឱ្យប្រជាពលរដ្ឋទាមទាររកយុត្តិធម៌។ លោកបានសរសេរថា ដូនតាយើងមានសមត្ថភាពកសាងអង្គរ។ យើងត្រូវតែមានសមត្ថភាពកសាងយុត្តិធម៌។ កុំសម្លាប់ខ្លួន កុំសុំយុត្តិធម៌ តែត្រូវទាមទារយុត្តិធម៌។ តើទាមទាររកយុត្តិធម៌ពីអ្វី? រកយុត្តិធម៌ក្នុងពេលដែលខ្លួនកំពុងរស់នៅយ៉ាងសុខសាន្ត រស់នៅយ៉ាងល្អក្នុងប្រទេសដែលកំពុងមានសុខសន្តិភាពពេញលេញឬលោក គឹម សុខ? ជាការពិតណាស់ លោកនិយាយត្រូវត្រង់ថា ដូនតាយើងមានសមត្ថភាពកសាងអង្គរ ហើយខ្ញុំសូមបន្ថែមថា ដូនតាយើងបានបង្កើតនូវកូនចៅជំនាន់ក្រោយពូកែៗ និងល្អៗច្រើនណាស់ តែគួរឱ្យស្តាយដែលមានកូនចៅជំនាន់ក្រោយដែលចោលម្សៀត អត់កំណើត និងថោកទាបដូចរូបលោកនេះ។
ក្នុងនាមជាកូនខ្មែរមានឈាមជ័រដូចគ្នា ខ្ញុំស្នើសុំជាជំហរទៅកាន់រូបលោកឱ្យគិតពិចារណាឡើងវិញនូវអ្វីដែលលោកបានប្រព្រឹត្ត ហើយត្រឡប់មកធ្វើជាអ្នកវិភាគមួយដែលអាចជួយដល់ប្រទេសជាតិ និងប្រជាពលរដ្ឋខ្មែរបាន។ ត្បិតថា ក្បាលរបស់លោកទំពែក តែសូមកុំឱ្យខួរក្បាលរបស់លោកទំពែកដូចក្បាលលោកអី ព្រោះវាមិនល្អទេ ស្តាប់ខ្ញុំទៅ! ប៉ុន្តែ បើសិនជារូបលោកនៅតែបន្តឱ្យខួរក្បាលរបស់លោកទំពែកដូចក្បាលលោកនោះ លោកនឹងក្លាយជាសត្រូវរបស់ផលប្រយោជន៍ជាតិ និងប្រជាពលរដ្ឋកម្ពុជា ហើយប្រជាពលរដ្ឋកម្ពុជា រួមទាំងរូបខ្ញុំម្នាក់ផងនៅតែហៅលោកថា ជាអ្នកវិភាគចោលម្សៀត និងជាអ្នកវិភាគមិនគ្រប់ទឹក៕
ដោយ៖ ជម្ពូនុទ
