ក្រសួងអប់រំ យុវជន និងកីឡា ក្រុមហ៊ុន Meta និងអង្គការ ខេប បានសហការគ្នាដើម្បីសម្ពោធដាក់ឱ្យប្រើប្រាស់ជាផ្លូវការ នូវឯកសារបណ្តុះបណ្តាលអក្ខរកម្មឌីជីថលខ្មែរ (KDLP) សម្រាប់ប្រើប្រាស់នៅសាលារៀនជំនាន់ថ្មី។
ថ្លែងក្នុងពិធីសម្ពោធ ដែលធ្វើឡើងនៅថ្ងៃទី ២៣ ខែតុលា ឆ្នាំ២០២៣ លោកស្រី គឹម សេដ្ឋានី រដ្ឋលេខាធិការប្រចាំ ក្រសួងអប់រំ យុវជន និងកីឡា បានលើកឡើងថា ក្នុងរាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត វិស័យអប់រំត្រូវបានចាត់ទុកជាវិស័យអាទិភាពមួយ ក្នុងចំណោមកំណែទម្រង់សំខាន់ៗរបស់រាជរដ្ឋាភិបាលកម្ពុជា។
ជាមួយគ្នានេះ លោកស្រី ក៏បានវាយតម្លៃខ្ពស់ កោតសរសើរ និងអបអរសាទរចំពោះ ក្រុមការងារក្រោមការគាំទ្រដោយក្រុមហ៊ុន មេតា ដែលសម្រេចបានការងារ និងឈានដល់ការសម្ពោធដាក់ឱ្យប្រើប្រាស់ជាផ្លូវការ ឯកសារបណ្តុះបណ្តាលអក្ខរកម្មឌីជីថលខ្មែរនេះឡើង ដែលជាផ្នែកមួយក្នុងការលើកកម្ពស់ការអប់រំឌីជីថលនៅកម្ពុជាផងដែរ។
គួរបញ្ជាក់ដែរថា ពិធីសម្ពោធខាងលើនេះ មានអ្នកចូលរួមប្រមាណជា ៥០នាក់ ដែលជាក្រុមការងារក្រសួងអប់រំ យុវជន និងកីឡា ក្រុមការងារបច្ចេកទេស នាយកសាលា និងគ្រូបង្គោលទាំង១២ តំណាងក្រុមហ៊ុន Meta និងក្រុមការងារអង្គការ ខេប។
បើតាមក្រសួងអប់រំ បានបញ្ជាក់ថា ការដាក់ឱ្យប្រើប្រាស់ជាផ្លូវការឯកសារបណ្តុះបណ្តាលអក្ខរកម្មឌីជីថលខ្មែរនៅកម្ពុជានាពេលនេះ នឹងផ្តល់នៅអត្ថប្រយោជន៍នៃឯកសារបណ្តុះបណ្តាលនេះសម្រាប់គ្រូ និងសិស្សនៅក្នុងសាលារៀនជំនាន់ថ្មី។
មិនតែប៉ុណ្ណោះ ការដាក់ឱ្យប្រើប្រាស់ជាផ្លូវការឯកសារបណ្តុះបណ្តាលអក្ខរកម្មឌីជីថលខ្មែរនេះដែរ ក៏ជាការបង្កើនកិច្ចសហការល្អរវាងក្រហ៊ុន Meta ក្រសួងអប់រំ យុវជន និងកីឡា និងអង្គការ ខេប ដើម្បីធ្វើឱ្យប្រសើរឡើងនូវការសិក្សាបែបឌីជីថលក្នុងចំណោមសិស្សនៅក្នុងក្របខណ្ឌសាលារៀនជំនាន់ថ្មី ដែលជាការចូលរួមចំណែកដ៏សំខាន់មួយដល់ការអប់រំឌីជីថលនៅកម្ពុជា និងជំរុញការអភិវឌ្ឍជំនាញឌីជីថលនៅកម្រិតមធ្យមសិក្សាបឋមភូមិ និងមធ្យមសិក្សាទុតិយភូមិនាពេលអនាគតផងដែរ៕
